Kompyuter o‘yinlariga qaramlik Xalqaro kasalliklar tasnifiga kiritildi

Videoo‘yinlarga bo‘lgan haddan tashqari ishtiyoq odamda psixologik stress va funksional buzilishlarni rivojlanishiga olib kelishi mumkin. Bu haqda Jahon sog‘liqni saqlash tashkiloti (JSST)ning psixoaktiv moddalarni iste’mol qilish va o‘ziga qaramlik xatti-harakatlari bo‘yicha mutaxassisi Vladimir Poznyak ma’lum qildi.

Mutaxassisning ta’kidlashicha, millionlab odamlar bo‘sh vaqtni o‘tkazish uchun videoo‘yinlar o‘ynaydi. Biroq bu holatda "onlayn va oflayn faoliyat o‘rtasidagi muvozanatni" saqlash juda muhimdir.

"COVID-19 pandemiyasi kabi qiyin vaqtda, odamlar uyda o‘tirishga majbur bo‘ladi. Odatdagi kun tartibi sezilarli darajada buziladi. Shu sabab videoo‘yinlar kabi zararli xatti-harakatlarga bog‘lanib qolish oson bo‘ladi", deydi Poznyak.

Shuningdek, u 2022 yil 1 yanvardan kuchga kiradigan Xalqaro kasalliklar tasnifi (XKT-11) ning yangilangan versiyasiga kompyuter o‘yinlariga qaramlik ham kiritilishini aytib o‘tdi.