Қозоғистонда нефтчилар намойиш уюштиргани учун қўлга олинди (видео)

Қозоғистоннинг Остона шаҳрида кеча, 11 апрель куни Жанаўзен нефтчиларидан иборат намойишчилар қўлга олинди. Бу ҳақда “Kazinform” агентлиги хабар берди.

Остона полиция департаменти жанаўзенлик ишчиларнинг ҳибсга олинишига изоҳ берган. Унга кўра, нефть хизмати компаниясининг бир гуруҳ ишчилари 10 апрелдан бери Остонада рухсат этилмаган митинг уюштирган. Мамлакат қонунчилигига мувофиқ, оммавий тадбирлар маҳаллий ижро этувчи ҳокимият органларини олдиндан хабардор қилган ҳолда, аҳоли хавфсизлигини таъминлаш муассасаларининг нормал фаолият кўрсатишига тўсқинлик қилмайдиган чоралар кўрилган ҳолда, махсус ажратилган жойларда ўтказилиши керак.

“Митинг ўтказиш тўғрисида ЙҲХБга ариза берилмаганлиги, шунингдек, рухсат этилмаган жойда митинг ўтказиш бўйича “Тинч йиғилишлар тўғрисида”ги қонуннинг намойишчилар томонидан бузилганлиги муносабати билан митинг ташкилотчилари ва фаол иштирокчилари полицияга олиб кетилди”, дейди Остона полиция бошқармаси.

Полиция бўлимининг маълум қилишича, қоидабузарлар Қозоғистон Республикаси Маъмурий жавобгарлик тўғрисидаги кодексининг 488- ва 667-моддалари бўйича огоҳлантириш ёки 30 ойлик ҳисоб-китоб кўрсаткичи миқдорида жарима ёки 15 суткагача маъмурий қамоққа олишга сабаб бўладиган маъмурий жавобгарликка тортилади. Уларнинг хатти-ҳаракатларига амалдаги қонун ҳужжатларига мувофиқ ҳуқуқий баҳо берилади.

Намойишга нима сабаб бўлди?

Жорий йилнинг 10 апрель куни Жанаўзендан ўз талаблари билан келган 60-70 га яқин одам Остонадаги Қозоғистон Энергетика вазирлиги биноси ёнида йиғилган. Энергетика вазири Алмасадам Саткалиевнинг айтишича, Жанаўзен ишчилари билан музокаралар олиб борилган.

Вазиятга бош вазир ўринбосари Алтай Кульгинов ҳам изоҳ берган.

“Улар ютқазган компания тендерда ғалаба қозонишини хоҳлашмоқда, аммо бу мумкин эмас. Бу қонун доирасида амалга оширилиши керак. Тендер талаблари бор ва ҳамма нарсани судда ёки қонуний равишда кўриб чиқиш керак. Шундай қилиб, оддийгина талаб қилиш, ҳеч бўлмаганда, нотўғри. Бизнинг вазифамиз уларга мавжуд бўш иш ўринларини таклиф қилишдир, бу эса давлат органлари томонидан амалга оширилади”, дея тушунтирган Алтай Кульгинов.