Қозоғистон Қирғизистонга ҳарбий техника совға қилмоқчи

Олам 6113
image

Қозоғистон Мажилиси (парламентнинг қуйи палатаси) Қирғизистонга ҳарбий-техник ёрдам кўрсатишни назарда тутувчи битимни ратификация қилиш ҳақидаги қонун лойиҳасини маъқуллади.

2021 йилнинг 7 декабрь куни Нур-Султонда имзоланган келишувга кўра, Қозоғистон томони минтақа хавфсизлиги ва ҳарбий салоҳиятини таъминлаш мақсадида Қирғизистонга ҳарбий техникаларни текинга беради. Ёрдамнинг номлари ва миқдори дипломатик каналлар орқали келишиб олинади.

Битим Қозоғистон Сенати (парламент юқори палатаси) кўриб чиқиши учун тақдим этилган. 

Қозоғистон Мудофаа вазири ўринбосари Султон Камалетдинов қирғиз ҳарбийлари ушбу техникадан фақат мамлакат хавфсизлигини таъминлаш учун фойдаланиши мумкинлигини айтди. Улар олинган қуролларни учинчи шахсга топшириш ёки Мустақил Давлатлар Ҳамдўстлигига (МДҲ) аъзо давлатларга қарши фойдаланишга ҳақли бўлмайди. Ускуналарни топшириш билан боғлиқ барча молиявий харажатлар Қозоғистон томонидан қопланади.

Қозоғистон Қирғизистонга аввал ҳам қурол ўтказган. Хусусан, 2016 йил октябрь ойида у ўқ-дорилар ва зенит-ракета тизимлари учун эҳтиёт қисмларни совға қилди, деб ёзади “KazInform” портали. 2011 йилда Қозоғистон Қирғизистонга зирҳли техника ва ўқ-дорилар, 1999 йилда эса алоқа воситалари, артиллерия ва авиация ўқ-дориларини етказиб берган.

Сўнгги ойларда Қирғизистон ва Тожикистон чегарасида отишмалар содир бўлди. Март ойи ўрталарида икки томон чегарачилари бир-бирига қарата ўт очган, апрель ўрталаридаги тўқнашувда эса бир ҳарбий хизматчи яраланган.

Апрель ойи охирида Қирғизистон ҳукумати Туркия билан Bayraktar дронларини Тожикистонга етказиш тафсилотларини муҳокама қилиш ниятида эканлигини маълум қилган эди. Бишкек Анқарани “бу масалада эҳтиёткор бўлишга” чақирди.

Қирғизистон ва Тожикистон ўртасидаги чегара узунлиги 970 км. Улардан 460 таси демаркация қилишни талаб қилади, шу сабабли ҳар иккала давлат ҳам у ёки бу сайтга ўз даъволарини билдирганда вақти-вақти билан низолар келиб чиқади.

Юлдуз Абдурашидова
Мақолага баҳо беринг
Баҳолаганлар: 165
Рейтинг: 2.9
t
×