“Қонли ёмғир”: Эрондаги оролда ноёб ҳодиса кузатилди (видео)

Кеча, 16 декабрь куни Эрондаги Ҳормуз бўғозидаги орол соҳили ва денгиз суви ёмғир ёғиши ортидан қизил тусга кирди. Бу ҳақда “Gulf news” хабар берди.

Эрон жанубидаги Ҳормуз оролида кучли ёмғирлар орол қирғоғининг маҳаллий аҳоли “Қизил пляж” деб атайдиган қисмини ёрқин қирмизи рангга бўяди ва бу манзара ижтимоий тармоқларда томошабинлар ҳамда сайёҳларнинг эътиборини тортди. Интернетда тарқалган видео ва суратларда ёмғир сувлари қизил рангга бой минерал тупроқларни ёнбағирлардан денгизга оқизиб туширгани, натижада сув ҳам, қумли соҳил ҳам тўқ қизил тусга киргани акс этган.

Форс кўрфазидаги Ҳормуз бўғозида жойлашган Ҳормуз ороли табиий қизил тупроғи ва ранг-баранг манзаралари билан машҳур. Темирга бой тупроқ – маҳаллий тилда “голак” деб аталади – орол пляжларига ўзига хос ранг беради ва санъат, саноат ҳамда маданий мақсадларда қадрланади. Кучли ёмғир ёққанда қизил қоялар устидаги бу тупроқ сув билан денгизга ювилиб тушади ва ажойиб манзарани юзага келтиради.

Ёмғир таъсирида рангнинг ўзгариши оролда байрамона воқеа сифатида қабул қилинади ва сайёҳлар ҳамда фотографларни ўзига жалб этади. Instagram каби платформаларда тарқалган видеоларда ёмғир минералга бой чўкинди билан аралашиши биланоқ соҳил ва саёз сувлар ёрқин қизил рангга киргани кўринади. Айрим лавҳалар вирус каби тарқалиб, интернетда кенг қизиқиш уйғотади.

Бу ҳайратланарли ҳодиса оролнинг ноёб геологияси билан боғлиқ бўлса-да, ҳар куни такрорланавермайдиган ҳолат. Чўкиндилардаги темир оксиди ва бошқа минераллар сувга тушганда кучли қизил рангни ҳосил қилади. Айрим хабарларда бу ҳолат “қон ёмғири” деб аталган бўлса-да, унда ҳеч қандай биологик модда иштирок этмайди.

Кўп рангли рельефи сабаб “Камалак ороли” деб ҳам аталадиган Ҳормуз ороли йил давомида сайёҳларни ранг-баранг тупроқлари, қияли қирғоқлари ва тарихий обидалари билан ўзига тортади. Қизил пляждан ташқари орол манзарасида сариқ, тўқ сариқ ва бошқа ранглардаги геологик ранглар ҳам учрайди – булар минг йиллар давомида кечган мураккаб геологик жараёнлар натижаси ҳисобланади.