Қирғизистондаги кучли зилзила Ўзбекистон ва Қозоғистонда ҳам сезилди

Бугун, 6 октябрь куни Қирғизистонда содир бўлган зилзила Ўзбекистон ва Қозоғистонда ҳам сезилди. 

Қирғизистон Миллий фанлар академияси Сейсмология институтининг маълум қилишича, зилзила магнитудаси 6 балли бўлган. Ўзбекистон Фавқулодда вазиятлар вазирлигининг Сейсмопрогностик мониторинг Республика маркази эса зилзила эпимарказида сезилиш кучи 7 балл бўлганини маълум қилган.

Қирғизистон Миллий фанлар академияси Сейсмология институтига кўра, ерости силкинишлари бугун маҳаллий вақт билан соат 2:28 да қайд этилган. Зилзила эпимаркази Қирғизистон ҳудудида (Талас тоғ тизмаси), Чакмак-Суу қишлоғидан 23 км шимолий-ғарбийда, Башки-Туш қишлоғидан 25 км шимолда ва Таласдан 85 км жанубий-ғарбийда жойлашган. Зилзиланинг куч даражаси Чакмак-Суу қишлоғида 5,5 баллни, Башки-Терекда – 5 баллни, Кара-Сай, Кек-Сай, Шекер, Қайнар, Чон-Кара-Буура, Бакай-Ата қишлоқларида – 4,5 баллни, Талас шаҳрида эса – 4 баллни ташкил этган.

Зилзила Қозоғистоннинг жанубий ҳудудларида ҳам сезилган. Миллий сейсмологик кузатув ва тадқиқотлар илмий маркази маълумотига кўра, зилзила Остона вақти билан соат 1:29 да қайд этилган. Магнитудаси 5,9 ни ташкил этган. Ерости силкинишларини Жамбил ва Туркистон вилоятлари ҳамда Чимкент шаҳри аҳолиси ҳис қилган.

Ўзбекистон Республикаси ҳудудида сезилиш кучи эса қуйидагича:

• Наманган вилоятида 3-4 балл, 106 км.
• Андижон вилоятида 3 балл, 144 км.
• Фарғона вилоятида 2-3 балл, 176 км.
• Тошкент шаҳрида 2-3 балл, 199 км.
• Сирдарё вилоятида 2 балл, 275 км.

Ҳозирда ҳеч бир давлат ҳудудида зилзила етказган талафот ҳақида маълумот мавжуд эмас.

Маълумот учун, кеча, 5 октябрь куни кундуз соат 12:20 да ҳам Қирғизистон–Хитой чегарасида магнитудаси тахминан 4 бўлган зилзила қайд этилган. Қирғизистон Миллий фанлар академияси Сейсмология институти маълумотларига кўра, ерости силкинишлари Майдантаг тоғ тизмаси ҳудудида, Норин шаҳридан 140 км жанубий-шарқда содир бўлган. Қирғизистон ҳудудидаги аҳоли пунктларида зилзила сезилмаган.