Qirg‘iziston birinchi Prezidenti xalqdan kechirim so‘radi 

Qirg‘iziston birinchi Prezidenti Asqar Akayev “Qumtor” koni bo‘yicha shartnoma tuzishda yo‘l qo‘ygan xatolarini tan oldi va qirg‘iz xalqidan kechirim so‘radi. Bu haqda mahalliy OAV xabar bermoqda.  

Sobiq Prezidentning so‘zlariga ko‘ra, u davlat rahbari sifatida shartnomalar tuzish paytida yo‘l qo‘yilgan xatolar uchun javobgardir. Shu bilan birga, Akayev bu jarayonda yo‘ldan adashganini ta’kidlagan.

Akayev 2003 yilda “Kumtor”ni “Senterra”ga berish bo‘yicha shartnomani “katta xato”, deb atagan.

Eslatib o‘tamiz, joriy yilning 2 avgust kuni 16 yil mobaynida Rossiyada yashab kelgan Akayev vatani — Qirg‘izistonga qaytarildi. Dastlab, sobiq Prezidenti “Qumtor” oltin koni bo‘yicha Milliy xavfsizlik davlat qo‘mitasi tomonidan so‘roq qilindi. So‘ngra, u davlat rahbari Sadir Japarov bilan uchrashdi. Uchrashuvdan so‘ng, Asqar Akayev matbuot anjumanida Qirg‘iziston Prezidentiga “hamma narsani aytib berish” imkoniyati uchun minnatdorlik bildirgan.   

Ma’lumot o‘rnida, Asqar Akayev Qirg‘izistonni 1991 yildan 2005 yilgacha boshqargan, u davlat to‘ntarishi natijasida lavozimidan chetlatilgan. U 2005 yildan beri Rossiyada bo‘lib, ilmiy faoliyat bilan shug‘ullangan. 2021 yilning iyul oyida Akayev xalqaro qidiruvga berilgan. Qirg‘izistonning sobiq Bosh vaziri Feliks Kulovning aytishicha, sobiq prezidentning o‘zi ixtiyoriy ravishda Bishkekka kelib, “Qumtor”ga qarshi jinoiy ish doirasida guvohlik bergan.