Исроил халқаро босим остида Ғазога ёрдам киритишга рухсат берди

north_east

Исроил қамали туфайли 290 мингга яқин Ғазо болалари ўлим ёқасида (фото)

Исроил Бош вазири Биньямин Нетаньяхунинг маъмурияти Ғазо секторига озиқ-овқат маҳсулотларини “асосий ҳажмда” киритишга рухсат берилишини маълум қилди. Бу ҳақда “The Jerusalem Post” хабар берди.

Нашрнинг ёзишича, маъмурият ушбу қарорни Исроил армиясининг тавсияси асосида қабул қилган. Ҳарбийлар бу чорани ҲАМАСга қарши ҳарбий ҳаракатларни кенгайтириш бўйича оператив зарурат билан изоҳлаган.

Нетаньяху маъмуриятининг билдиришича, гуманитар ёрдамни тақсимлаш устидан ҲАМАС назоратини ўрнатишининг олдини олиш учун зарур чоралар кўрилади.

“Israel Hayom” нашрининг мамлакат ҳукумати йиғилишида иштирок этган манбаларга таяниб хабар беришича, бу қарорнинг асосий сабаби АҚШ томонидан кўрсатилаётган босим бўлган. Нетаньяхунинг сўзларига кўра, Ғазо секторидаги озиқ-овқат омборлари ниҳоятда камайиб кетган, шу боис ҳам чоралар кўришга тўғри келган.

“Дунё бўйлаб “Ғазодаги очарчилик” мавзусида кенг миқёсли кампания кетмоқда ва биз Европа ҳамда АҚШдаги дўстларимиз томонидан босимга учрамоқдамиз”, деган Бош вазир.

Манбаларга кўра, бу қарорга олиб келган яна бир омил Франция Президенти Эммануэль Макроннинг бир томонлама равишда Фаластин давлатини тан олувчи давлатлар коалициясига етакчилик қилиш нияти ҳақидаги хабарлар бўлган. Исроиллик расмийлар бу ташаббусга қарши чиқиш мақсадида гуманитар ёрдамга рухсат бериш сиёсий жиҳатдан фойдали бўлиши мумкин, деб ҳисобламоқда.

Қайд этиш жоиз, ўтган йилнинг ноябрь ойида Исроил Бирлашган Миллатлар Ташкилотининг Яқин Шарқдаги Фаластинлик қочқинларга ёрдам кўрсатиш ва ишларни ташкил этиш агентлиги (UNRWA) билан ҳамкорликни тўхтатганди. Кейинроқ БМТнинг Жаҳон озиқ-овқат дастури Исроил Фаластин анклавига озиқ-овқат ва инсонпарварлик ёрдами етказиб беришни чеклашда давом этиши оқибатида Ғазо секторида очарчилик юзага келишидан огоҳлантирди.

Эслатиб ўтамиз, аввалроқ Исроил армияси Ғазо секторида “Гидеон аравалари” номли ерусти ҳарбий операцияси бошланганини хабар қилган эди. Улар аллақачон ўнлаб ҲАМАС аъзоларини йўқ қилган, ер усти ва ер остидаги ҲАМАС инфратузилмасини демонтаж қилган ва айни пайтда Ғазо секторида асосий позицияларга жойлаштирилмоқда.