Ислом ҳамкорлик ташкилоти бугун Хониянинг ўлими юзасидан йиғилиш ўтказади

Ислом ҳамкорлик ташкилоти (ИҲТ) бугун, 7 август куни Жидда шаҳридаги ИҲТ Бош котибиятида Фаластин-Исроил вазиятини, жумладан, ҲАМАС сиёсий бюроси раиси Исмоил Хониянинг ўлдирилишини муҳокама қилиш учун Ташқи ишлар вазирлари даражасидаги ижроия қўмитасининг навбатдан ташқари йиғилишини ўтказади. Бу ҳақда ташкилот матбуот хизмати хабар берди. 

“Исроил босқинчилигининг Фаластин халқига, хусусан Ғазо секторига нисбатан давом этаётган ваҳшийликларига жавобан ушбу йиғилиш ўтказилди. Ҳозиргача бу ҳаракатлар 40 000 дан ортиқ одамнинг ўлимига ва 91 000 дан ортиқ фаластинлик тинч аҳолининг жароҳатланишига олиб келди, уларнинг аксарияти аёллар ва болалардир”, дейилади ташкилот баёнотида.

Маълумот учун, 31 июль куни Хониянинг Теҳрондаги қароргоҳига зарба берилди. Эроннинг янги Президенти Масъуд Пезешкиённинг инаугурация маросимида иштирок этиш учун Эронга келган Хония вафот этди. ҲАМАС ҳаракати қотилликда Исроилни айблади ва воқеани теракт деб атади. Эрон Хониянинг ўлими учун “тегишли вақтда ва жойда” қасос олишга ваъда берди.

Эслатиб ўтамиз, олдинроқ ҲАМАСнинг Ғазо секторидаги етакчиси Яҳё Синвар ҳаракат сиёсий бюроси раҳбари этиб сайланганди.