G20 иштирокчилари Украина борасида келишувга эриша олмади 

Ҳиндистон пойтахти Янги Деҳлида бугун, 2 март куни бўлиб ўтган G20 давлатлари ташқи ишлар идоралари раҳбарларининг йиғилишида иштирокчилар Украинадаги можаро бўйича келишувга эриша олмади. Бу ҳақда Ҳиндистон ташқи ишлар вазири Субраманьям Жайшанкар учрашув якунлари бўйича ўтказилган матбуот анжуманида айтиб ўтди.

Қайд этилишича, йиғилиш сўнггида қабул қилинган якуний ҳужжатнинг 1-, 2- ва 5- дан 24- гача бўлган бандлари бўйича барча ташқи ишлар вазирлари келишувга эришган. Бироқ Украина можаросига бағишланган 3- ва 4- бандлар Россия ва Хитой томонидан рад этилган.

“Очиғини айтсам, Украина можароси билан боғлиқ бўлган масалалар, улар бўйича келишмовчиликлар бор эди. Биз турли нуқтаи назарга эга бўлган томонлар билан бу борада келиша олмадик”, деган вазир Жайшанкар.

Шунингдек, Ҳиндистон Бош вазири Нарендра Моди ҳам G20 иштирокчилари глобал келишувга, урушларнинг олдини олиш ва умумий масалалар бўйича халқаро ҳамкорликни рағбатлантиришнинг асосий мақсадларига эриша олмаганини билдирган. У G20 глобал кескинликни бартараф этишда муваффақиятсизликка учраганини тан олган.

Таъкидланишича, Ҳиндистоннинг учрашувдаги позицияси мамлакатларни бир-биридан ажратиб турувчи нарсани эмас, балки уларни бирлаштирувчи жиҳатни излашдан иборат бўлган. Бош вазир Моди ҳам қатнашчиларга айнан шундай ҳаракат қилишни маслаҳат берган.