Франция терма жамоасининг собиқ юлдузи зўравонликда айбланмоқда

Франция терма жамоасининг собиқ футболчиси Димитри Пайет атрофида янги жанжал авж олмоқда. 2023 йилдан 2025 йилгача Бразилиянинг “Васко да Гама” клубида ўйнаган француз футболчиси жиддий айбловлар остида қолмоқда. Пайетнинг собиқ севгилиси Бразилиядаги муносабатлар давомида жисмоний, руҳий ва жинсий зўравонликка дуч келганини даъво қилмоқда. Бу ҳақда “The Sun” нашри хабар берди.

Пайетнинг собиқ севгилиси Ларисса Феррарининг сўзларига кўра, у Пайет билан 2023 йилда ижтимоий тармоқлар орқали танишган. Дастлаб футболчи ғамхўр бўлган, аммо вақт ўтиши билан унинг хатти-ҳаракати ўзгарган: қизнинг ҳар бир ҳаракатини назорат қилган ва уни қийнай бошлаган. 2024 йил апрель ойида Феррари спортчи ҳақида Бразилия полициясига хабар бериб, Пайет унга жисмоний ҳужум қилганини ва турли хил зўравонлик турларини қўллаганини даъво қилган.

Ларисса Феррари шунингдек, Пайет уни ҳақоратли хатти-ҳаракатларга мажбурлаганини ва психологик манипуляция орқали назорат қилганини айтган. У футболчидан ҳомиладор бўлганини, аммо кейинчалик боласини йўқотганини ҳам даъво қилмоқда.

Ҳозирча Димитри Пайет ўзига қарши қўйилган барча айбловларни қатъиян рад этмоқда. 

Маълумот учун, Пайет 2025 йил ёзида “Васко да Гама” билан шартномасини тугатганидан кейин ҳозирда клубсиз қолмоқда.