Финляндияда икки вертолёт тўқнашди. Қурбонлар бор

Финляндиянинг ғарбида Кокемаки шаҳридаги аэродромга йўл олган иккита фуқаролик вертолёти тўқнашиб кетди. Бу ҳақда “Yle” хабар берди.

Маълум қилинишича, бортларда жами беш киши бўлган, бир вертолётда икки киши, қолган уч киши эса бошқа вертолётда бўлган. Уларнинг барчаси воқеа жойида ҳалок бўлган. Ҳозирда полиция ҳалок бўлганларнинг шахсларини аниқлаш устида иш олиб бормоқда.

Манбаларга кўра, эҳтимол, ҳалок бўлганлар орасида бир неча эстониялик тадбиркорлар бўлиши мумкин.

Финляндия Мудофаа вазирлиги воқеани ҳарбий техника ва ҳарбий объектлар билан боғламаслигини таъкидлаган.

Қайд этилишича, вертолётлар Эстониянинг Таллин шаҳридан йўлга чиққан. Қутқарувчилар вертолётларни бир-биридан тахминан 100 метр узоқликда, ўрмон ҳудудида топган.

Гувоҳларнинг сўзларига кўра, вертолётлар бир-бирига жуда яқин учиб ўтгач, бирданига бир вертолёт кескин силжиб, иккинчисига урилган. Тез орада даҳшатли шовқин эшитилиб, бир вертолёт ерга қулаб тушган, иккинчиси эса спираль шаклида пасайишни бошлаган.

Эслатиб ўтамиз, жорий йилнинг 9 май куни Шри-Ланканинг марказий қисмидаги Мадуру Ойя сув омборига Bell 212 вертолёти қулаб тушганди ва оқибатда вертолёт ичида бўлган 6 нафар ҳарбий вафот этган эди.