Эрон Президенти Тожикистонга келади

Эрон Президенти Иброҳим Раисий жорий йилнинг 7 ноябрь куни Душанбега икки кунлик ташриф билан келади ва Тожикистон Президенти Имомали Раҳмон билан музокаралар ўтказади. Бу ҳақда Тожикистон етакчисининг матбуот хизмати раҳбари Абдуфаттоҳ Шарифзода маълум қилди.

"Эрон Президенти 7-8 ноябрь кунлари Тожикистонга расмий ташриф билан келади. Ташриф доирасида Тожикистон Президенти билан икки томонлама учрашув ва томонларнинг кенгайтирилган таркибдаги музокаралари режалаштирилган", дейди у.

Шунингдек, Тожикистон сармоя ва давлат мулкини бошқариш қўмитаси 8-9 ноябрь кунлари Душанбеда икки давлат тадбиркорлари форуми ўтказилиши режалаштирилганини хабар қилган.

Маълумот учун, ўтган йилнинг октябрь ойида Раҳмон ва Тожикистон Мудофаа вазири Шерали Мирзо Душанбеда Эрон Мудофаа вазири Муҳаммад Ризо Аштианий билан хавфсизлик масалаларини муҳокама қилган.

Эслатиб ўтамиз, кеча, 1 ноябрь куни Эрон Ташқи ишлар вазири Ҳусайн Амир Абдуллаҳиён Президент Иброҳим Раисийнинг тез орада Туркияга ташриф буюришни режалаштираётганини айтганди.