Эрон Майкл Помпеонинг ташрифини рад этди

Мамлакат расмийлари AҚШ давлат котиби Майкл Помпеонинг Эронга расмий ташрифи ҳақидаги таклифини қабул қилмади.

“Яқинда мен Теҳронга боришни ва Эрон халқи билан бевосита гаплашишни таклиф қилдим. Режим менинг таклифимни қабул қилмади”, деб ёзди Помпео Тwitterдаги саҳифасида. Кейинчалик у Қўшма Штатлар бунга жавобан Эрон ташқи ишлар вазири Жавад Зарифга ўхшаш имкониятни рад этмаслигини қўшимча қилди.
 
Aввалроқ AҚШ президенти Дональд Трамп ва давлат котиби Майк Помпео Эрон билан музокаралар олиб боришга тайёр эканликларини билдирган, аммо Теҳрон музокаралар фақат Эроннинг позициясини ҳисобга олган ҳолда мумкинлигини таъкидлаган. 

“Эрон ҳеч қачон қийин шароитларда музокаралар олиб бормайди. Сиз бирон бир Эронликга таҳдид қила олмайсиз ва унинг жанг қилишини кутолмайсиз. Музокаралар таҳдид билан эмас, балки ҳурмат нуқтаи назаридан амалга оширилади ", деган эди Жавад Зариф.

Июнь ойи охирида AҚШ молия вазири Стивен Мнучин Вашингтон Зарифга қарши санкция чораларини кўришини айтганди. Бироқ, июль ойида AҚШ ҳукумати ташқи ишлар вазирини санкциялар рўйхатига киритмасликка қарор қилди.

Aмерика Қўшма Штатлари 2018 йил май ойида Эрон билан 2015 йилда тузилган ядровий келишувдан чиқиб кетишини ва мамлакатга қарши барча санкцияларнинг тикланганини эълон қилди. Вашингтон Теҳронга қарши Эрон билан савдо қилаётган бошқа давлатларга таъсир кўрсатадиган иккинчи даражали санкцияларни ҳам янгилади. 

2019 йил апрель ойида AҚШ Эронга қарши санкцияларни кенгайтирди, Эрон нефтига тўлиқ эмбарго киритди ва бир ойдан сўнг Эрон темир, пўлат, алюминий ва мис ишлаб чиқарувчиларига нисбатан санкцияларни жорий этди.

Бунга жавобан Эрон ядровий битим бўйича бир қатор мажбуриятларни бажаришни расман тўхтатди. Июль ойи бошида Эрон уранни Биргаликдаги кенг қамровли ҳаракатлар режасига зид бўлган 3,67 фоиз даражасидан юқори даражада бойитишга киришганини маълум қилган эди. Ушбу баёнотга жавобан AҚШ Эронга янги санкциялар билан таҳдид қилди.

Ўтган ойда Эрон ушбу мамлакатнинг ҳаво ҳудудида бўлган AҚШ учувчисиз учоғини уриб юборганини эълон қилди. Бунга жавобан Трамп Эроннинг бир қатор объектларига зарбалар беришни буюрди, аммо охирги пайтда ўз фикрини ўзгартирди.