Эрдўған Зеленский билан суҳбатда яна Путинга қарши гапирди

Олам 11763
image

Туркия Республикаси Президенти Ражаб Тойиб Эрдўған кеча, 2 ноябрь куни Украина Президенти Владимир Зеленский билан телефон орқали мулоқот қилди. Томонлар навбатдаги суҳбатда Россия-Украина урушидаги сўнгги ўзгаришларни муҳокама қилган. Бу ҳақда Туркия раҳбари маъмуриятининг Алоқа бошқармаси хабар берди.  

Учрашувда Президент Эрдўған, ғалла ташишдаги муаммони ҳамкорликда ҳал қилганликларидан мамнунлигини билдирган.

Украинанинг ҳам, Россиянинг ҳам дон маҳсулотларини сотиш қобилияти бутун дунё учун муҳим аҳамиятга эга эканлигини таъкидлаган Туркия етакчиси, ғалла жўнатиш келишувининг давом эттирилишининг аҳамиятини урғулаган. 

Шунингдек, у, Украинанинг ҳудудий яхлитлиги ва суверенитетини тўлиқ тиклайдиган тушунча асосида урушнинг адолатли ечим билан тугатилиши учун дипломатик саъй-ҳаракатларни кучайтириш кераклигини билдирган. 

Украина Президенти Владимир Зеленский Twitter ижтимоий тармоғида пост эълон қилиб,  Эрдўғанга қўллаб-қувватлагани учун миннатдорлик билдирди. 

“Мен Туркия Президенти Эрдўғанга ғалла келишувини сақлашдаги фаол иштироки, Украина суверенитети ва ҳудудий яхлитлигини сўзсиз қўллаб-қувватлагани учун миннатдорлик билдирдим. Биз украиналик ҳарбий асирлар ва сиёсий маҳбусларни қайтариш бўйича кейинги қадамларни муҳокама қилдик. Туркиянинг ёрдамига тўлиқ ишонаман”, деб ёзган.

Эслатиб ўтамиз, жорий йилнинг 29 октябрь куни Россия Мудофаа вазирлиги аннекция қилинган Севастополдаги Қора денгиз ҳарбий флотига уюштирилган ҳужум муносабати билан Украинадан озиқ-овқат маҳсулотларини экспорт қилишга мўлжалланган келишувдаги фаолиятини тўхтатишини маълум қилган эди. Расмий Москва ҳужум "дон йўлаги"дан фойдаланган ҳолда уюштирилганини таъкидамоқда.

Маълумот учун, 22 июль куни Истанбулда Туркия Президенти Ражаб Тойиб Эрдўған ва БМТ Бош котиби Антониу Гутерриш иштирокида Украина портларидан ғаллани хавфсиз ташиш бўйича келишув имзоланди. Ҳужжатни Украина, Россия, БМТ ва Туркия вакиллари имзолади. Дон шартномаси Украинанинг Одесса, Южний ва Черноморск портларини ўз ичига олади.

Шартнома муддати 19 ноябрда тугайди. Бирлашган Миллатлар Ташкилоти ва Туркия аввалроқ келишувни узайтиришга чақирган эди.

Октябрь ойида Қрим кўпригида портлаш бўлиши ортидан Россия Президенти Владимир Путин дон келишуви тўхтатиб қўйилиши мумкинлигини айтганди. У портловчи ускуна дон йўлаги орқали Қримга олиб келингани тасдиқланса, шундай қилинишини айтди.

Qalampir.uz Tahririyati
Мақолага баҳо беринг
Баҳолаганлар: 123
Рейтинг: 3.1
t
×