Эрдўған Туркияга иқтисодий босим қилишнинг оқибати нима бўлишини айтди

Туркия Президенти Ражаб Тойиб Эрдўған мамлакатга иқтисодий босим ўтказиш, жумладан, молия тизимини беқарорлаштиришга уринишларни беҳуда деб атади. Бу ҳақда “Anadolu Agency” хабар берди. 

“Валюта курслари, фоиз ставкалари ва нархларнинг ошиши билан мамлакатимизни безовта қилмоқчи бўлганлар ўйнаётганини кўряпмиз. Биз ўзимизнинг “ўйин режамиз”га амал қилишда давом этамиз”, дейди Туркия раҳбари.

Эрдўған Туркия илгари турли “тузоқ ва машаққатларни” енгиб ўтганидек, ҳозирги “иқтисодий озодлик уруши”дан ҳам ғалаба билан чиқишига ишонч билдирди.

Президент мамлакат расмийлари валюта курсининг ошиши баҳонасида нархларни ҳаддан ташқари оширишга уринишларни тўхтатмоқчи эканини таъкидлади.

Шунингдек, у мамлакат ҳукумати Туркиянинг молиявий инқирозларни бошқариш бўйича тажрибасини “дунё бошдан кечираётган фавқулодда давр” учун қўллаш ниятида эканини таъкидлади.

Президент Туркия сармоя, ишлаб чиқариш, иш билан таъминлаш ва экспортга қаратилган иқтисодий сиёсат олиб боришга эътибор қаратганини қўшимча қилди.

Давлат раҳбари яқинда Қора денгизда аниқланган табиий газ захиралари Туркиянинг энг муҳим бўлган энергетика муаммосини ҳал этиш умидларини кучайтираётганини айтган.

Қайд этиш жоизки, турк лираси сўнгги ойларда долларга нисбатан кескин қадрсизланмоқда. Хусусан, сентябрь ойи охирида 1 доллар 8,85 лирани ташкил қилган бўлса, октябрь ойи охирида 9,6 лирагача кўтарилган. Бугунги кунга келиб эса бу кўрсаткич 12,58 лирани ташкил қилмоқда.