Эл Чоло истеъфога кетиши мумкин

Бу мавсумда “Атлетико Мадрид” клубининг ҳа деганда “кетмони учмаяпти.” Шу сабаб футболчи ва мураббий сифатида “Атлетико” билан узоқ йиллар бирга бўлган, Диего Симеоне вазифасидан озод қилиниши мумкин.

“Атлетико Мадрид” Ла Лиганинг 23-тури доирасида “Барселона” майдонига сафар қилиб, 4-2 ҳисобида имкониятни бой берди. Шундан сўнг, Диегонинг лавозимидан озод этилиши ҳақида гап тарқалди. Эл Чолонинг истеъфоси ҳақидаги хабарларга каталонияликлардан учралган мағлубиятгина эмас, ушбу мавсумда Мадрид клуби Симеоне бошчилигидаги энг ёмон мавсумларидан бирини ўтказаётгани ҳам сабаб бўлиши мумкин. Олдинги, ҳимояда “темирдек” қаттиқ ва ўта тартибли бўлган жамоа қаергадир йўқолиб қолди.

Диего Симеоне футболчи сифатида “матрасчилар” сафида 1994-1997 ва 2003- 2004 йилларда ҳаракат қилган бўлса, мураббий сифатида 2011 йилдан бери мадридликларга бошчилик қилиб келмоқда. Шу вақт оралиғида, “Атлетико Мадрид” билан икки марта Ла Лига чемпионлигини қўлга кириб, икки бор Европа Чемпионлар лигаси финалига чиқишни уддалади. Бу зафарлар камтар бўлиши мумкин, лекин аргентиналик мутахассис бошчилигидаги “Атлетико Мадрид” Европанинг ҳар қандай жамоаси билан баҳслаша оладиган даражага чиқди. Нима бўлган тақдирда ҳам Диего “Атлетико”нинг афсонаси бўлиб қолади.

Мадридликлар раҳбарияти Эл Чоло ўрнига икки нафар мураббий номзодини кўриб чиқмоқда. Булар: “Интер” клуби бош мураббийи Симоне Инзаги ва ПСЖ устози Маурисио Почеттино ҳам бор. Лекин Инзагининг “Интер”даги ишлари ажойиб ривожланмоқда. Маурисио Почеттино эса “Манчестер Юнайтед”ни бошқаришни хоҳламоқда. Шу сабаб, бу икки мутахассисдан бирини олиб келиш қийин бўлиши мумкин.

Маълумот ўрнида, “Атлетико Мадрид” Испания чемпионатида 22 та ўйин ўтказиб, 35 очко жамғарди. Турнир жадвалида эса 5-ўринга жойлашган.

Маъруф Абдумаликов