Dominikanda samolyot qulashi ortidan ikki kishi halok bo‘ldi (video)

Dominikan Respublikasida Gulfstream G200 rusumli xususiy samolyot quladi va yonib ketdi. Hodisa oqibatida ikki kishi – uchuvchi va ikkinchi uchuvchi halok bo‘ldi. Samolyot bortida yo‘lovchilar bo‘lmagan. Bu haqda “Times of India” xabar berdi.

Aviatsiya idoralari ma’lumotiga ko‘ra, samolyot favqulodda signalni La-Romana shahrining janubi-g‘arbida taxminan 16 dengiz mili uzoqlikda bergan. Ekipaj xalqaro La-Romana aeroportiga qaytishga uringan, biroq qo‘nish paytida samolyot uchish-qo‘nish yo‘lagida halokatga uchrab, yongan.

Ijtimoiy tarmoqlarda tarqalgan videolarda aeroport ustida qalin tutun ko‘tarilgani ko‘rinadi. Hodisa joyiga o‘t o‘chirish xizmatlari yetib kelib, yong‘inni bartaraf etgan.

Hozirda aviatsiya idoralari voqea sabablarini aniqlash bo‘yicha tergov boshlagan. La-Romana xalqaro aeroporti ushbu hududdagi sayyohlik markaziga xizmat ko‘rsatadi. Voqeaning boshqa tafsilotlari hozircha oshkor qilinmagan.
Hodisa joyida tezkor xizmatlar faoliyat olib bormoqda.

Eslatib o‘tamiz, avvalroq Qozog‘istonning Pavlodar viloyatida aviatsiya-kimyoviy ishlarni bajarayotgan An-2 samolyoti halokatga uchragandi. Dastlabki ma’lumotlarga ko‘ra, havo kemasi yuqori kuchlanishli elektr uzatish tarmog‘iga tegib ketgan.