Дания фермаларидаги барча қоракўзанлар йўқ қилинади

Дания ҳукумати мамлакатда 1139 та фермер хўжалигида 17 миллион донагача қоракўзанни йўқ қилишга қарор қилди.  Чунки ҳайвонларда одамларга юқиши мумкин бўлган SARS-CoV-2 коронавирусининг мутацияси аниқланган. Бу ҳақда Бош вазир Метте Фредериксен маълум қилган, деб хабар бермоқда “ВВС News”.

Бош вазирнинг сўзларига кўра, мутацияга учраган коронавирус Ютландиянинг бешта фермасидан топилган. 12 киши уни юқтириб олган. Мутахассисларнинг фикрига кўра, бу мутация организмнинг ушбу вирусга қарши антитаначалар ишлаб чиқариш қобилиятини пасайтиради. 

Метте Фредериксен вазиятни "жуда жиддий", деб атади. Унинг сўзларига кўра, ҳукуматнинг ўз халқи олдида катта масъулияти бор.  Аммо аниқланган мутация ҳисобга олинса, бутун дунё олдидаги масъулият янада ошади.

Маълумот ўрнида, Дания қоракўзан мўйнаси етиштириш бўйича Европада етакчи мамлакат ҳисобланади. Шу сабаб озиқ-овқат ва балиқчилик вазири Могенс Енсен фермерларга давлат томонидан ёрдам беришни ваъда қилди.

Мамлакатдаги 200 дан ортиқ фермер хўжалигида коронавирус аллақачон аниқланган, улардан 67 тасида барча ҳайвонлар йўқ қилинган. Июнь ойи бошида Нидерландия ҳукумати худди шу қарорни мамлакатдаги қоркўзан хўжаликларида коронавирус инфекцияси пайдо бўлганидан кейин қабул қилган эди.