Қайнона келини ҳамроҳлигида ўғлининг ўйнашини дўппослади (видео)

Жорий йилнинг 24 июль куни Қашқадарё вилоятининг Чироқчи туманида она ва келин қариндошлари билан омма олдида ўғли билан никоҳсиз яшаб келаётган қизни калтаклаб, уни кийимсиз ҳолатда қолдирди. Бу ҳақда вилоят Ички ишлар бошқармаси хабар берди.

Қайд этилишича, соат 22:30 ларда Чироқчи туманида яшовчи аёл Д.И. 102 рақамига мурожаат қилиб, у билан бирга расмий никоҳсиз яшаб келаётган эркак Н.П.нинг онаси хонадонига келиб, жанжал кўтараётганини маълум қилган.

Билдиришича, Н.П.нинг расмий никоҳида бўлган аёли қариндошлари билан бирга жамоат жойида “Сенга эрим керакми?” деб Д.И.ни бир неча маротаба танасининг турли жойларига тепиб, уриб кийимсиз ҳолатда қолдирган. Ҳодиса жойига профилактика инспектори етиб бориб, жанжални бартараф этиш мақсадида Н.П.ни туман ИИБ биносига олиб борган. 

Мазкур ҳолатларнинг видеотасвири ижтимоий тармоқларда тарқалиб жамоатчилик эътирозига сабаб бўлган. Маълум қилинишича, профилактика инспектори томонидан тўлиқ терговга қадар текширув ҳаракатлари олиб борилган ва процесс иштирокчиларининг олган тан жароҳати оғирлик даражасини аниқлаш мақсадида судга оид тиббий экспертиза тайинланган.

Қайд этилишича, ҳолат юзасидан Чироқчи туман ИИБ ҳузуридаги Тергов бўлинмаси томонидан жиноят кодексининг 277-моддаси (безорилик) 1-қисми билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Андижонда тадбиркор аёл қўл остида сотувчи бўлиб ишловчи, 2005 йилда туғилган қизни калтаклагани ва кейинроқ ушбу аёлга нисбатан жиноят иши қўзғатилгани ҳақида хабар берилганди.