Бухорода IELTS’дан 8 олганини нишонлаётган қиз ток уриб вафот этди

Бухоро вилоятида IELTS имтиҳонидан 8 балл олганини қариндошлари билан нишонлаб, тадбирдан сўнг идиш-товоқларни юваётган 15 ёшли қиз ток уриши оқибатида вафот этди. Бу ҳақда QALAMPIR.UZ манбаси хабар берди.

Манбанинг билдиришича, қиз воқеа содир бўлган куни IELTS имтиҳонидан юқори балл олган. Шу сабабли қариндошлар йиғилган. Ҳамма кетганидан сўнг эса қиз идиш-товоқларни юваётганда қувватлагичга теккан ва оқибатда уни ток урган. 

QALAMPIR.UZ ҳолатга анқилик киритиш мақсадида Бош прокуратура матбуот котиби Ҳаёт Шамсутдинов билан боғланди. Унинг билдиришича, жорий йилнинг 17 июнь куни Ғиждувон туман ИИБ навбатчилик қисмига 2010 йилда туғилган қиз электр токи уриши оқибатида вафот этгани тўғрисида хабарнома келиб тушган.

Хабарномага асосан ҳодиса жойи тезкор-тергов гуруҳи томонидан кўздан кечирилиб, иш учун аҳамиятли бўлган 1 дона электр узатгич ва ҳаво совутиш ускунаси олинган. Шунингдек, марҳуманинг жасадини ташқи кўздан кечириш жараёнида чап қўл кафт қисми ва ўнг оёқ бош бармоғи ён томонидаги электр токи таъсиридан келиб чиққан шилинмадан бошқа бирор-бир жароҳат ва унинг излари аниқланмаган.

Ҳозирда ҳолат юзасидан туман прокуратураси томонидан терговга қадар текширув ҳаракатлари олиб борилмоқда.

Эслатиб ўтамиз, аввалроқ Наманган вилоятининг Давлатобод туманида 5-синф ўқувчиси электр токи уриши оқибатида вафот этганди.