Buxoroda Germaniyaga ishga yuborishni va’da qilgan shaxs ushlandi

Buxoro viloyatida uch nafar fuqaroni Germaniyaga ishga yuborishni va’da qilib, ulardan qariyb 20 ming AQSH dollari va 2 million so‘m olgan shaxsga nisbatan jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Departamentining Buxoro viloyati boshqarmasi tomonidan o‘tkazilgan tergovga qadar tekshiruvda aniqlanishicha, fuqaro B.R. o‘zini ko‘p yillardan buyon Germaniyada ishlab kelayotgan shaxs sifatida tanishtirib, go‘yoki yuqori lavozimlarda ishlovchi tanishlari orqali fuqarolarni ushbu davlatga ishga yuborishini va’da qilgan.

U shu yo‘l bilan uch nafar fuqaroning ishonchiga kirib, ulardan jami 19 800 AQSH dollari hamda 2 million so‘mni firibgarlik yo‘li bilan qo‘lga kiritgani aniqlangan.

Bildirilishicha, mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

Eslatib o‘tamiz, avvalroq Toshkentda fuqarolarni Germaniyaga ishga yuborishni va’da qilgan shaxslar ushlangandi.