Аёл футболчиларни душда видеога олган мураббий умрбод футболдан четлатилди

Европа футбол ассоциациялари иттифоқи (UEFA) Чехия аёллар терма жамоасининг собиқ мураббийи Петр Влаховскини футболдан умрбод четлатди. У аёл футболчиларни кийим алмаштириш ва душ қабул қилиш вақтида яширинча видеога олган. Бу ҳақда “The Athletic” хабар беради.

Нашрнинг ёзишича, 2019 ва 2023 йиллар оралиғида Влаховски рюкзагига ўрнатилган яширин камерадан фойдаланиб, аёл футболчиларнинг машғулотлар ва ўйинлардан олдин ҳамда кейин кийиниш хоналарида душ қабул қилаётгани ва кийим алмаштираётганини тасвирга олган. Спортчиларнинг энг ёши 17 ёшда бўлган.

Таъкидланишича, UEFA Халқаро футбол федерацияси (FIFA)ни шунга ўхшаш санкцияларни жорий этишга ҳамда Чехия футбол ассоциациясидан мутахассиснинг мураббийлик лицензиясини бекор қилишни талаб қилишга чақирган.

2023 йилда Влаховски аёл футболчиларни кийиниш хоналари ва душларда яширинча суратга олгани аниқлангандан сўнг, ҳибсга олинган. Кейин суд унга жабрланган 13 спортчига компенсация тўлашни буюрган. 2025 йилнинг май ойида Чехия суди мураббийни бир йиллик шартли қамоқ жазосига ва мамлакатда мураббийлик фаолиятини беш йилга тақиқлашга ҳукм қилган.

Шунингдек, у компьютерида топилган болалар порнографиясини сақлашда айбдор деб топилган. Чехия футбол ассоциацияси қарордан кейин мураббийга бошқа жазо чораларини қўллай олмаган, чунки у энди ассоциация аъзоси эмас.