Америкалик мулозим Хитой учун жосуслик қилгани аниқланди

Америка Қўшма Штатларининг Жанубий Калифорния ҳудудидаги Аркадия шаҳри мэри Эйлин Ванг Хитой ҳукумати манфаатлари йўлида ноқонуний агент сифатида ишлаганини тан олди ва лавозимидан истеъфо берди. Бу ҳақда “Associated Press” хабар берди.

58 ёшли Ванг жорий йилнинг апрель ойида “хорижий ҳукуматнинг ноқонуний агенти сифатида фаолият юритиш” айби билан жавобгарликка тортилган. Тергов маълумотларига кўра, у Хитой амалдорлари топшириқларини бажарган, жумладан, Пекинни қўллаб-қувватловчи мақолаларни тарқатган. Шу билан бирга, қонунда талаб қилинганидек бу ҳақда Америка ҳукуматига олдиндан хабар бермаган.

Ванг 2022 йил ноябрида беш кишилик шаҳар кенгашига сайланган. Мэр лавозими эса кенгаш аъзолари ўртасида навбат билан бериб келинади. Шаҳар менежери Доминик Лаццаретто баёнотида шаҳар бюджети ёки ходимлари бу ишга аралашмаганини айтган.

“Биз аниқ қилиб айтмоқчимиз, бу тергов шахсий хатти-ҳаракатларга тегишли. Айбловлар Ванг 2022 йил декабрида лавозимга киришганидан кейин тўхтаган фаолиятга оид”, деган у.

Америка федерал амалдорларининг маълум қилишича, Ванг жиноятни тан олган. Бу айб бўйича унга 10 йилгача федерал қамоқ жазоси тайинланиши мумкин. Вангнинг адвокатлари Жейсон Лян ва Брайан Сан баёнот бериб, мижози айбнинг жиддийлигини тушуниши ва ўтмишдаги шахсий хатолари учун масъулиятни қабул қилишини билдирган.

“У шахсий ҳаётида қилган хатолари учун узр сўрайди. Унинг Аркадия жамоасига бўлган муҳаббати ва садоқати ўзгармаган”, деган адвокатлар.

Тергов келишувига кўра, Ванг ва унинг ҳамкори Яонинг Майк Сан 2020 йил охиридан 2022 йилгача Хитой Халқ Республикаси амалдорлари манфаатлари йўлида ишлаган. Улар Америкада Хитойни қўллаб-қувватловчи тарғиботни ёйиш билан шуғулланган. Майк Сан ўтган йил октябрда худди шу айбни тан олган ва тўрт йиллик қамоқ жазосини олган. У Вангнинг 2022 йилги сайлов кампаниясида ғазначи сифатида ҳам қайд этилган. Ванг ва Сан хитойлик америкаликлар учун мўлжалланган U.S. News Center ахборот сайтини бошқарган.

Терговга кўра, Хитой амалдорлари уларга сайтда Пекин тарафдорлари материалларини жойлаштириш бўйича кўрсатма берган. 2021 йил июнь ойида Хитойнинг Лос-Анжелесдаги бош консули “Los Angeles Times” газетасида чиққан мақолага ҳавола юборган. Мақолада Синьцзянда (Шинжон) уйғурларни таъқиб қилиниши, мажбурий меҳнат ва зўравонлик ҳақидаги хабарлар рад этилган.

“Синьцзянда ҳеч қачон геноцид бўлмаган ва пахта далалари ёки бошқа соҳаларда мажбурий меҳнат йўқ”, дейилади мақолада.

Ойбек Рустамов