“Ал-Ҳилол” Ямаль учун рекорд нарх таклиф қилди

Саудиянинг “Ал-Ҳилол” клуби “Барселона”нинг ёш юлдузи Ламин Ямаль учун 400 миллион евролик таклиф билан чиқди. Бу трансфер амалга ошса, футбол тарихидаги энг қиммат битим сифатида қайд этилиши мумкин. Бу ҳақда “Fichajes” нашри хабар берди.

Ямаль яқинда “Барселона” билан шартномасини 2031 йилгача узайтирди. Унинг йиллик маоши 21 миллион еврога яқин бўлиб, бу клубнинг унга бўлган ишончини ифодалайди. Бироқ “Ал-Ҳилол” томонидан таклиф этилган рекорд миқдордаги маблағ каталонияликларнинг режаларини ўзгартириб юбориши мумкин. Саудия клуби Ламин Ямаль учун етти йиллик шартнома тайёрлаган.

Дастлаб “Барселона” бу таклифни рад этгани ва Ямални жамоанинг келажаги сифатида кўраётгани айтилди. Аммо молиявий босим ҳамда футболчининг ўз амбициялари вазиятни мураккаблаштирган.

Манбага кўра, жамоа ичида ҳам таранглик мавжуд. Айрим футболчилар, жумладан, Ямаль ҳам мураббий Ханси Фликнинг сўнгги танқидий чиқишларидан норози бўлган. Бу эса футболчининг келажакка оид қарорига таъсир қилиши мумкинлиги ҳақида тахминларга сабаб бўлмоқда.

Маълумот учун, 18 ёшли Ямаль “Барселона” билан ўтган мавсумда Испания Ла Лигаси, Испания кубоги ва суперкубогида ғолиб бўлган эди. Шунингдек, Ямаль Испания миллий терма жамоаси билан Евро-2024 мусобақасида ғолиб чиқди.