АҚШ, Япония ва Австралия Хитойга қарши бирлашмоқчи

Хитойнинг минтақада ошиб бораётган қудратидан хавотирга тушган Япония ва АҚШ кеча, 7 январь куни яқин ҳамкорликни йўлга қўйиш бўйича қўшма баёнотни эълон қилди. 

Вашингтон ва Токио томонидан мудофаа ва ташқи ишлар вазирлари иштирокида ўтказилган онлайн учрашув мобайнида, томонлар Хитойнинг Тайванга нисбатан ошиб бораётган босимини муҳокама қилишган. Япония расмийларига кўра, Тайванга нисбатан қилинган ҳар қандай босим Япония хавфсизлиги учун таҳдид сифатида кўрилади. 

Расмийлар, Хитойнинг халқаро меъёрлар ва қоидаларни бузишга интилиши нафақат минтақада, балки бутун дунёда иқтисодий, ҳарбий ва технологик муаммоларни келтириб чиқаришига тўхталишган. 

“Томонлар минтақадаги вазиятни издан чиқариш учун қилинаётган ҳаракатларга қарши бирлашиш, керак бўлса биргаликда жавоб қайтариш чорасини кўради”, дейилади қўшма баёнотда. 

Маълум қилинишича, вазирлар Хитой ҳукуматининг Шинжон, Гонконг ва Тайван ҳудудларида инсон ҳуқуқларининг бузилиши билан боғлиқ сиёсатини қоралаб, у ҳудудларда тинчлик ўрнатилиши ўта зарурлиги ҳақида алоҳида таъкидлашган. 

Бундан ташқари, 6 январь куни онлайн учрашув чоғида Япония Австралия билан ҳам мудофаа бўйича ҳамкорлик шартномасини имзолашга эришган. 

Табиий равишда, уч давлатнинг ҳамкорлик ҳаракатларига қарши Хитой огоҳлантирувчи баёнот билан чиқди. 

“Биз АҚШ, Япония ва Австралиянинг Хитой ички ишларига қўпол тарзда аралашуви ҳамда Хитойни қоралаш, минтақа давлатларининг ҳамжиҳатлиги ва ўзаро ишончига путур етказиш мақсадида ёлғон маълумотлар тарқатишини қаттиқ қоралаймиз ва бунга қатъий қаршилик қиламиз”, деган, Хитой Ташқи ишлар вазирлиги Матбуот котиби Ван Венбин Пекиндаги матбуот анжуманида. 

Сўнгги пайтларда Хитой, АҚШ, КХДР ва Россия ўртасида қуролланиш пойгаси авж олган. Бу давлатлар гипертовушли, дунёдаги энг тезкор ракета синови устида иш олиб боришмоқда. Япония мудофаа вазирига кўра, минтақада қуролланиш пойгаси авж олган паллада ҳарбий соҳада япон-америка ҳамкорлигини йўлга қўйиш жуда муҳим. 

“Биз барча мавжуд воситаларни, шу жумладан ракеталарга қарши мудофаа қобилиятини мустаҳкамлаш учун Қўшма Штатлар билан ҳамкорлик қилишимиз керак”, дея билдирган мудофаа вазири Нобуо Киши журналистларга берган интервьюсида.