АҚШ Россияни асосий даромадидан маҳрум қилмоқчи

АҚШ ва унинг иттифоқчилари охир-оқибат Россияни нефть ва газ экспортидан келадиган ҳар қандай даромаддан маҳрум қилишга интилмоқда. Бу ҳақда АҚШ Президентининг Миллий хавфсизлик бўйича маслаҳатчи ўринбосари Далип Сингх маълум қилди.

“Тўғри айтасиз, нефть ва газ етказиб беришдан олинган даромад Россияда қолган асосий даромаддир. Ва биз ишонамизки, вақт ўтиши билан биз Россияни асосий энергия етказиб берувчи мақомидан маҳрум қилишимиз мумкин. Биз Германия билан “Шимолий оқим 2” газ қувурини ёпиш устида ишлаяпмиз, Россиянинг энергетика соҳасида зарур технологияларни қўлга киритиш имкониятини тўхтатдик”, деган Сингх CNN телеканалида.

Оқ уй вакилининг таъкидлашича, бундай чора-тадбирларни амалга ошириш вақт талаб этади. 

“Бироқ, биз охир-оқибат Россияни нефть ва газ етказиб беришдан оладиган ҳар қандай даромаддан маҳрум қилишни мўлжаллаяпмиз”, дейди АҚШнинг юқори мартабали амалдори.

Қўшма Штатлар жаҳон энергетика бозоридаги нархларнинг ошишини Россиянинг Украинага қарши уруши билан боғлаган. Ушбу воқеалар фонида, март ойи бошида Америка Президенти Россияга қарши санкциялар доирасида РФдан энергия импортини ва мамлакат энергетика соҳасига янги сармояларни киритишни тақиқловчи фармонни имзолади. Шундан сўнг, Қўшма Штатларда ёқилғи қуйиш шохобчаларида бензин нархи кескин кўтарила бошлади, бунинг учун мамлакатда кўпчилик Байден ва унинг маъмурияти аъзоларини танқид қилди.