АҚШ Россияга қарши санкциялар рўйхатини кенгайтирди
Олам
−
20 Октябрь 2022 4386
Кеча, 19 октябрь куни АҚШ расмийлари Россияга қарши санкциялар рўйхатини бир Россия фуқароси, шунингдек, Германия ва Бирлашган Араб Амирликларида жойлашган иккита компанияни қўшиб кенгайтирди. Бу ҳақда АҚШ Молия вазирлиги маълум қилди.
“Бугун, Адлия вазирлиги ва Федерал қидирув бюроси билан келишилган ҳолда, АҚШ Ғазначилик департаментининг Хорижий активларни назорат қилиш бошқармаси (OFAC) АҚШдан ҳарбий ва [миллий хавфсизлик учун] нозик икки томонлама фойдаланиш технологияларини сотиб олиш ва уларни Россия Федерациясидаги охирги фойдаланувчиларга етказиб бериш билан шуғулланган Россия тармоғига қарши санкциялар жорий қилмоқда”, дейилади вазирлик баёнотида.
Чекловлар Юрий Ореховга ва Вашингтонга кўра, унинг Nord-Deutsche Industrieanlagenbau GmbH ва Opus Energy Trading LLC компанияларига нисбатан жорий қилинмоқда. Санкциялар рўйхатига кириш АҚШдаги активларни музлатиш ва Америка фуқаролари ёки компанияларига улар билан бизнес юритиш тақиқланишини англатади.
АҚШ ҳукумати шунингдек, беш нафар Россия фуқароси ва икки Венесуэла нефть савдогарини санкциялардан қочиш ва пул ювишда айблади. АҚШнинг Нью-Йорк жанубий округи прокуратураси улар “АҚШ ҳарбий технологиясини ва санкциялар остидаги Венесуэла нефтини ноқонуний олиш схемасида қатнашган” деб даъво қилмоқда. Айбланувчилар орасида Юрий Орехов, шунингдек, АҚШ Адлия вазирлиги маълумотларига кўра, Красноярск ўлкаси губернатори Александр Усснинг ўғли Артем Усс ҳам бор.
Live
Барчаси