АҚШ Россия Украинага қачон “ҳужум қилишини” билмаслигини тан олди

Қўшма Штатлар Украинага “босқин”нинг аниқ санасини айта олмайди. АҚШ Президентининг Миллий хавфсизлик бўйича маслаҳатчи Жейк Салливан кеча, 13 февраль куни CNN телеканалига берган интервюсида Вашингтон ҳужум “исталган кун” бошланишини кутаётганини айтган.

“Биз аниқ санани башорат қила олмаймиз”, деган Салливан журналистнинг тегишли саволига жавобан. Унинг сўзларига кўра, Қўшма Штатлар “босқин, Россиянинг Украинадаги ҳарбий амалиётлари исталган вақтда бошланиши мумкин”, деб ҳисоблайди.

У Украина атрофида кескинликнинг кучайиши “келгуси ҳафтада, Олимпиада ўйинлари тугашидан олдин” содир бўлиши мумкинлигини ҳам истисно қилмаган. 

“Бу Олимпиададан кейин ҳам содир бўлиши мумкин. Бундан ташқари, эҳтимол, биз Россия дипломатик йўлни танлаши мумкин деб ўйлаймиз”, дея давом этган Салливан.

Шу билан бирга, АҚШ Президентининг ёрдамчиси “ҳарбий операциялар жуда тез орада бошланиши мумкин”, деб таъкидлаган, “чегарадаги кучларнинг тўпланиши ва ҳаракати” шундан дарак бермоқда. 

“Охирги 10 кун ичида биз кўраётган нарса бу Россия қўшинларининг <...> Украина билан чегарага яқин жойда тўпланиши ва ҳаракатланиши”, деган Салливан.

Салливанга кўра, НАТО иттифоқчилари АҚШ разведкасининг Россия Украинага қарши режалаштирган босқинчилиги учун баҳона тайёрлаётгани ҳақидаги хулосаларига қўшилади.

Салливаннинг қўшимча қилишича, АҚШ бу маълумотни Россия бу режалардан воз кечишини кутган ҳолда тарқатмоқда, чунки улар ошкор қилинган.