АҚШ Эронда муваффақиятсизликка учради – Хоманаий

Бугун, 8 январь куни Эрон олий раҳнамоси Оятуллоҳ Али Хоманаий Эроннинг АҚШ билан музокара қилишдан бош тортиши сабаблари ҳақидаги саволларга жавоб берар экан, Қўшма Штатлар мамлакатда муваффақиятсизликка учраганини айтди. Бу ҳақда ИРНА хабар берди.

“Америка Ислом инқилобидан олдин Эронга эгалик қилган, бироқ мамлакатдан чиқариб юборилган. Шунинг учун унинг Эронга ва инқилобга бўлган нафрати чуқур ҳамда осонликча сўнмайди. Паҳлавийлар даврида Эрон “Америка манфаатлари қалъаси” бўлган. Айнан шу қалъада америкаликлар башорат қилмаган инқилоб пайдо бўлди. Улар алданиб, зулматда қолиб кетди”, деган Хоманаий.

Инқилоб етакчисининг таъкидлашича, ўнлаб йиллар давомида америкаликлар Эронга нисбатан сиёсатида қайта-қайта хатога йўл қўйган.

“Бу сўзлар Америка сиёсий манёврлари таъсирида бўлганларга қаратилган”, дейди у.

Оятуллоҳ Али Хоманаий, шунингдек, душманнинг “юмшоқ уруши” ёлғон тарқатиш ва жамоатчилик онгида воқеликни идрок этишни бузишни ўз ичига олади, деб тушунтирди.

“Сиз ўз позициянгизни мустаҳкамлаганингизда, душман жамиятни заифлашаётганингизга ишонтиришга ҳаракат қилади. Унинг ўзи заифлашиб бораётган бир пайтда, у кучайиб бораётганини даъво қилишда давом этмоқда. У сизнинг таҳдидингиз камайиб кетганда ҳам таҳдид қилади. Бу уларнинг тарғиботи ва баъзи одамлар унинг таъсирига тушиб қолади”, дейди у.

Унинг сўзларига кўра, мамлакат ахборот-маданий тузилмалари, жумладан, Маданият ва ислом иродаси вазирлиги, шунингдек, оммавий ахборот воситаларининг асосий вазифаси душман кучи ҳақидаги иллюзияларни йўқ қилиш, унинг тарғибот-ташвиқотини жамоатчилик фикрига таъсир этишига йўл қўймасликдир.

Ислом инқилоби етакчиси Эрон АҚШ билан музокара қилишни истамагани ва Европани Американинг ўхшаши сифатида кўраётгани учун икки томонга муносабатда унчалик фарқ йўқ, деган фикрга изоҳ берди.

“Баъзилар нега Америка билан муомала қилишни истамаяпсиз, лекин айни пайтда Европа билан алоқаларингизни давом эттирасиз? дейди. Аммо фарқ шундаки, Америка дастлаб Эронга эгалик қилган ва бу мамлакат унинг ҳукмронлигидан озод бўлган. Американинг Эрон ва Ислом инқилобига бўлган нафрати шу қадар чуқурки, уни осонликча енгиб бўлмайди. Бу ҳар қандай Европа давлатидан фарқ қилади”, дейди Хоманаий.

Унинг қайд этишича, ўтган қирқ йил давомида Эронни ўз назоратига қайтариш учун Қўшма Штатлар жуда катта маблағ сарфлаган, аммо бунга эриша олмаган.

Олий раҳнамо Эрон зулмга қарши курашаётган ва ўз ҳуқуқларини ҳимоя қилганларни қўллаб-қувватлашда давом этишини таъкидлади. У тажовузга дуч келган мамлакатлар ва халқларни курашдан қайтмасликка, қаршилик руҳини сақлаб қолишга чақирди.

Эслатиб ўтамиз, аввалроқ Эрон олий раҳнамоси Оятуллоҳ Али Хоманаий АҚШ ва Исроилни Суриянинг собиқ президенти Башар Асаднинг ҳокимиятдан ағдарилишини уюштирганликда айблаганди.