“Agent 007” jarimaga tortildi

O‘zining “Jentilmencha o‘g‘rilik”, “Arvoh jinoyatchilar”, “Ajnabiy” va “Jeyms Bond” kabi filmlari bilan tanilgan Pirs Brosnan AQSHdagi milliy bog‘ga ruxsatsiz kirgani uchun jarimaga tortildi. Bu haqda “Thye Guardian” nashri xabar berdi.

Qayd etilishicha, britaniyalik maxfiy agent Jeyms Bond rolini o‘ynagan beshinchi aktyor Pirs Brosnan o‘tgan yilning noyabr oyida AQSHning “Yellowstoun” milliy bog‘idagi taqiqlangan hududga kirganlikda ayblangan. Aniqlanishicha, 70 yoshli aktyor milliy bog‘ning “Mamont teraslari” deb nomlangan cheklangan hududida sayr qilgan.

Sud qaroriga ko‘ra, Brosnan qilgan qonunbuzarligi uchun 500 dollar jarima to‘laydi va “Yellowstoun Forever” xayriya tashkilotiga 1000 dollar o‘tkazadi.

Ma’lumot uchun, “Yellowstoun” har yili millionlab sayyohlarni qabul qiladi va u yerda tashrif buyuruvchilarga belgilangan marshrutga rioya etish tavsiya etiladi. Taqiqlangan hududda mashinalar to‘xtashi cheklangan, shuningdek, ruxsatsiz kirganlarga qamoq jazosi va katta jarimalar tayinlanishi belgilangan.

Eslatib o‘tamiz, oldinroq Janubiy Koreya sudi “Kalmar o‘yini” serialidagi 79 yoshli aktyor O Yon Suga yetti yil oldin sodir qilgan jinsiy zo‘ravonligi uchun shartli hukm chiqargan va jazoni ikki yilga kechiktirish sharti bilan sakkiz oylik qamoq jazosi tayinlagandi.

Ulkanbayeva Rayhona