21 ёшли спортчи қизни зўрлаб ўлдиришда айбланган маҳкум норозилик билдирди
Олам
−
18 Апрель 22906
Қозоғистоннинг Манғистау вилояти суди 21 ёшли ақтаулик спортчи қиз Валерия Шалновани зўрлаб ўлдиришда айбдор деб топилган шахснинг апелляция шикоятини кўриб чиқди. Бу ҳақда "Orda.kz" хабар берди.
Нашрнинг ёзишича, маҳкумнинг адвокатлари ҳукмни бекор қилишни ва судланувчини оқлашни талаб қилган.
Маълумотларга кўра, аввалроқ жиноят ишлари бўйича Манғистау вилояти туманлараро ихтисослаштирилган суди ушбу иш бўйича гумонланувчини айбдор деб топган. Суд хулосасига кўра, у Валерия Шалновага жинсий тажовуз қилиб, жиноятини яшириш учун спортчини ўлдирган.
Ўшанда ҳам айбланувчи ўз айбини тан олмаган. Шунга қарамай, суд уни 22 йилга озодликдан маҳрум қилган.
Бу сафар ҳам маҳкум ва унинг ҳимоячилари апелляция шикояти билан судга мурожаат қилган. Аммо вилоят суди адвокатларнинг важларини кўриб чиқиб, аввалги суд қарорини ўз кучида қолдирган.
“Ҳукмни ўзгартириш ёки бекор қилиш учун асос етарли эмас. Жиноят ишлари бўйича судлов ҳайъатининг ҳал қилув қарори билан биринчи инстанция судининг ҳукми ўзгаришсиз қолдирилди”, дейилган вилоят суди хабарида.
Маълумот учун, ақтаулик 21 ёшли спортчи Валерия Шалнованинг ўлдирилиши 2023 йилнинг энг машҳур жиноятларидан бирига айланди. Қизнинг жасади МАЭЗ (Манғистау атом энергетика заводи) сув ҳавзасидан топилган.
Live
Барчаси
