Уруш авжида – Зеленский АҚШда

21 декабрь куни Украина Президенти Владимир Зеленский Америка Қўшма Штатларига етиб борди. У шу заҳотиёқ Президент Жозеф Байден билан учрашди. Оқ уй айвонида Зеленскийни Жо Байден рафиқаси Жилл Байден билан қарши олди. 

Владимир Зеленский таклиф ва Украинанинг ҳақиқий дўстлари орасида самимий қабул учун миннатдорлик билдирди. У Украина халқи номидан Жозеф Байден ва барча америкаликларга Украинага кўрсатган улкан ёрдами ва етакчилиги учун миннатдорлик билдирди. 

“Жаноб Президент, бу ерда бўлиш мен учун катта шарафдир. Мен эртароқ келмоқчи эдим, аммо қийин вазият туфайли кела олмадим. Мен шу ердаман, демак, биз назорат қиламиз. Бу эса, биринчи навбатда, сизнинг қўллаб-қувватлаганингиз билан боғлиқ”, дейди Украина давлат раҳбари музокаралар бошланишидан олдин ОАВ вакиллари билан қисқа суҳбат чоғида. 

Байден ҳам Зеленскийга илтифот кўрсатди. 

“Жаноб Президент, Сизни яна бир бор кўрганимдан, биз билан бўлишга муваффақ бўлганингиздан хурсандман. Путин бошлаган шафқатсиз урушда биргаликда мудофаа қилишда сиз томонда бўлишдан фахрланаман. Бунга ишониш қийин,  лекин украиналикларнинг яшаш ҳуқуқига қилинган даҳшатли ҳужумдан 300 кун ўтди”, дея таъкидлади АҚШ Президенти. 

АҚШ раҳбари Украина халқининг ўз келажагини ҳимоя қилишда кўрсатган жасорати ва қатъиятини қайд этган. Қўшма Штатлар Украинанинг ўзини ҳимоя қилиш қобилиятини, шу жумладан ҳаво ҳужумидан мудофаа билан таъминлашда давом этади. 

Музокаралар бошланишидан олдин Владимир Зеленский Жозеф Байден билан яккама-якка ва кенгайтирилган таркибдаги учрашувда Америка томонини жанг майдони ва энергетика соҳасидаги вазият, шунингдек, Украинадаги босиб олинган ҳудудларни қайтариш, тинч аҳоли ва энергия тизимини ҳимоя қилиш эҳтиёжлари бўйича вазият билан таништиришини таъкидлади.  

Шунингдек, Украина Президенти учрашув бошланишидан олдин томонлар қишда мамлакатни қўллаб-қувватлаш чора-тадбирлари ва АҚШдан молиявий ёрдам кўрсатиш масалаларини муҳокама қилишларини маълум қилди. 

Бундан ташқари, Владимир Зеленский, хусусан, Украина тинчлик формуласини амалга ошириш, Россияга нисбатан санкциялар босимини кучайтириш, шунингдек, компенсация механизми ва махсус трибунал яратиш мавзуларини кўтаришни режалаштираётганини таъкидлади. 

Украина Президенти 24 февралда Россиянинг Украинага кенг миқёсли бостириб кириши бошланганидан бери биринчи хорижий ташрифини, хусусан, АҚШга, биринчи навбатда, асосий иттифоқчига 300 кундан ортиқ давом этаётган урушда тўлиқ миқёсда кўрсатилган қўллаб-қувватлаш учун миннатдорлик билдириш мақсадида амалга оширмоқда. Ташрифдан яна бир мақсад Украина ва АҚШ ўртасидаги келгуси йил ўзаро ҳамкорлигини муҳокама қилишдир. 

Шунингдек, АҚШ Президенти Жо Байден Оқ уйда Украина етакчиси Владимир Зеленский билан қўшма матбуот анжуманида Вашингтон ва Киев Украинадаги вазият ва уни тартибга солиш истиқболларига нисбатан “бир хил қарашда” эканини маьлум қилди.

“Менимча, биз бир хил қарашларга эгамиз. Биз иккаламиз ҳам бу уруш тугашини хоҳлаймиз", дейди Америка раҳбари. 

Унинг сўзларига кўра, агар Россия Федерацияси ўз қўшинларини олиб чиқиб кетса, можаро ҳал бўлиши мумкин эди. Бироқ, Байденнинг сўзларига кўра, энди бундай бўлмайди. 

“Кейин нима бўлади? Биз бугун Украинага жанг майдонида муваффақият қозонишига қандай ёрдам беришимиз ҳақида гаплашдик, токи Президент Зеленский Россия томони билан гаплашишга тайёр бўлса, у муваффақиятга эриша олади, чунки у жанг майдонида [муваффақият]га эришди”, дея қўшимча қилди Оқ уй раҳбари.  

У Украина АҚШ ва Европадаги иттифоқчилар ёрдами билан жанг майдонида муваффақият қозониши мумкинлигини урғулади. 

Россия Президенти матбуот котиби Дмитрий Песков ноябрь ойи охирида агар Киев сиёсий ирода кўрсатса ва Москванинг талабларини муҳокама қилишга тайёр бўлса, Россия ва Украина ўртасидаги музокаралар бошланиши мумкинлигини айтганди. Шу билан бирга, у энди ҳеч қандай музокаралар олиб борилмаслигини, чунки улар Украина томонидан мутлақо инкор этилишини таъкидлаганди. 

Шу куни кечқурун Оқ уйда АҚШ Президенти Жо Байден билан музокарадан сўнг Украина Президенти Владимир Зеленский АҚШ Конгресси ҳар икки палатасининг қўшма мажлисида нутқ сўзлаш учун Капитолийга келди. 

Украина Президенти сўзини бошлаб, Америка Конгрессида нутқ сўзлаш у учун катта шараф эканини таъкидлади. Унинг қайд этишича, Украина жанг майдонида аллақачон Россия устидан ғалаба қозонган ва украиналик дўстлари ва ҳамкорлари, биринчи навбатда, АҚШнинг катта қўллаб-қувватлашини инобатга олган ҳолда, буни давом эттиради. 

“Бу нафақат ҳудуд, балки Европанинг у ёки бу қисми учун кураш. Жанг фақат украиналиклар ёки Россия забт этишга уринаётган бошқа давлатларнинг ҳаёти, эркинлиги ва хавфсизлиги учун эмас. Бу кураш бизнинг болаларимиз ва невараларимиз қандай дунёда яшашини аниқлайди...  украиналиклар учун, америкаликлар учун, ҳамма учун демократия бўладими ёки йўқ, шуни белгилайди”, дейди Украина раҳбари. 

Зеленский Вашингтонга ушбу ташрифи арафасида Донбассдаги қалъа бўлган Бахмутга ташриф буюрганини, у рус босқинчиларига қарши қаҳрамонона мудофаани давом эттираётганини яна бир бор эслади. Америкалик қонун чиқарувчилар меҳмон бу сўзларни айтганида уни узоқ қарсаклар олқишлаган.  

Зеленский руслар артиллерия, ўқ-дорилар ва узоқ масофали ракеталар бўйича устунликка эга эканини тан олди. 

“Улар теварак-атрофдаги ҳамма нарсани вайрон қиладилар, бироқ украиналиклар ўз сафларида қоладилар ва ҳеч қачон таслим бўлмайдилар”, деб таъкидлади Украина раҳбари. 

Президент Зеленский Американинг Patriot ҳаво мудофаа тизимлари Украина осмони ва Украина шаҳарларини ҳимоя қилишга ёрдам беришига ишонч билдирди. Шунингдек, у Эроннинг Россия Қуролли кучлари учун учувчисиз учоқлар етказиб беришига ишора қилиб, бир террорчи бошқа террорчига ёрдам беришига йўл қўймаслик кераклигини таъкидлади. 

“Украина ҳеч қачон америкалик аскарлардан бизнинг ўрнимизга бизнинг заминимизда жанг қилишини сўрамаган. Сизни ишонтириб айтаманки, Украина аскарлари Америка танклари ва самолётларини мукаммал бошқаришга қодир”, дейди Владимир Зеленский америкалик қонунчиларни. 

Унинг таъкидлашича, Американинг Украинага ҳозирги ёрдами хайрия эмас, балки глобал хавфсизлик ва демократияга сармоядир. Зеленский, шунингдек, Украина халқи тинчлик, аммо адолатли дунёни исташини ва адолатли дунё Украина суверенитети ва ҳудудий яхлитлиги эканини айтди. 

"Рождество байрамида миллионлаб украиналикларда электр ёки сув бўлмаслиги мумкин", дейди Зеленский. 

Якунда Президент барча қонунчиларга, шахсан АҚШ президентига, шунингдек, ҳар бир америкалик оилага жанг майдонидаги Украинага ёрдам бергани учун яна бир бор миннатдорлик билдирди ва Конгресс раҳбариятига Украина миллий байроғини – Бахмутни ҳимоя қилган украиналик жангчилар совғасини топширди.  

“Бу байроқ урушдаги ғалабамиз рамзидир. Биз ушлаб турамиз, курашамиз ва ғалаба қозонамиз, чунки биз бирмиз: Украина, Америка ва бутун эркин дунё”, дея сўзини якунлади Зеленский барчани янги йил билан зафарли табриклаб.