Кремль Путин ва Байден учрашуви тафсилотларини маълум қилди

Хабарингиз бор, кеча, 7 декабрь куни Россия Президенти  Владимир Путин ва АҚШ Президенти Жозеф Байден ўртасида онлайн учрашув бўлиб ўтди. Кремль Матбуот хизмати учрашув қандай ўтгани ҳақида маълумот бериб, президентлар ўртасида очиқ суҳбат бўлиб ўтганини урғулади.

Кремль баёнотига кўра, муҳокама қилинган мавзулар орасида Украина муаммоси устунлик қилган, хусусан, Москва Донбасс бўйича 2015 йилги Минск келишувларини амалга оширишда олдинга силжиш йўқлигини таъкидлаган.

Байден учрашувда Путин Киевнинг Донбассга қарши провокацион ҳаракатларидан жиддий хавотирда эканини билдирган. 

Ўз навбатида, Байден Россия қўшинларининг Украина чегаралари яқинида ҳаракатланишининг “таҳдидли” хусусияти ҳақида гапириб, вазият янада кескинлашган тақдирда Қўшма Штатлар ва унинг иттифоқчилари томонидан жорий қилинадиган санкциялар қанчалар қаттиқ бўлишини айтиб ўтган.

“Путин бунга жавобан барча жавобгарликни Россия елкасига юклаш керакмаслигини таъкидлади, чунки айнан НАТО Украина ҳудудини босиб олишга хавфли уринишлар қилмоқда ва чегараларимизда ўзининг ҳарбий салоҳиятини оширмоқда”, дейилади Кремль баёнотида. 

Путин шунинг учун ҳам Россия НАТОнинг Шарқ давлатлари ҳисобига кенгайишини ҳамда қўшни давлатларга қуролларини жойлаштиришини истамаслигини маълум қилган. Кремлга кўра, Президентлар ўз вакилларига “ушбу нозик мавзулар бўйича маслаҳатлашувларга киришиш”га кўрсатма беришга келишиб олган.

Қайд этилишича, муҳокама чоғида Путин ва Байден икки давлат ўртасидаги ҳамкорлик, хусусан, дипломатик ваколатхоналар фаолиятидаги чекловлар туфайли “қониқарсиз ҳолатда” экани тан олишган.

“Россия икки томонлама муносабатларнинг бошқа жиҳатларини нормаллаштиришга хизмат қилиши учун дипломатик ваколатхоналар фаолиятидаги барча чекловларни бекор қилишни таклиф қилди”, дейилади баёнотда.

АҚШ ва Россия етакчилари, шунингдек кибержиноятчиларга қарши оператив ва техник соҳада ҳамкорликни кенгайтиришга ҳамда мулоқотни давом эттиришга келишиб олган.

Аввалроқ, Оқ уй Матбуот хизмати онлайн учрашув ҳақида маълумот берганди. Баёнотда Россия томон берган маълумотлардан фарқли ўлароқ, Эрон мавзусига ҳам тўхталиб ўтилгани таъкидланган.