Рашид Қодировга нисбатан зўравонлик ва қийноқлар бўлаётгани ростми?

Ўзбекистон Республикаси Бош прокуратураси мамлакатнинг собиқ бош прокурори Рашид Қодировга нисбатан жисмоний зўравонлик ишлатилаётгани ҳақида халқаро ташкилотлар тарқатган хабарларга нисбатан расмий раддия билан чиқди. Унда шундай дейилади:

"2019 йил 08 апрель куни интернет тармоғида Amnesty International ташкилотининг гўёки собиқ бош прокурор Рашид Қодировга нисбатан жисмоний зўравонлик ишлатилгани, қўпол муносабатда бўлингани, шунингдек бошқа судланувчиларга нисбатан ҳалигача қийноқлар хавфи сақланиб қолинаётганлиги тўғрисидаги мурожаати эълон қилинди.

Бош прокуратура томонидан Рашид Қодиров ва бошқаларга нисбатан Жиноят кодексининг тегишли моддалари бўйича 2018 йил 22 февраль куни қўзғатилган жиноят иши юзасидан тергов ҳаракатлари олиб борилган.

2018 йил 25 февраль куни Рашид Қодиров товламачилик, пора олиш, шунингдек, бошқа мансабдорлик ва иқтисодий жиноятларни содир этишда айбланиб, жиноят ишига айбланувчи тариқасида жалб қилинган ҳамда унга нисбатан қамоққа олиш тарзидаги эҳтиёт чораси қўлланилган.

Терговнинг бошиданоқ Рашид Қодировга ҳимояланиш ҳуқуқи берилган, адвокатнинг барча тергов ҳаракатларида иштироки, шунингдек, у билан ҳеч қандай чекловларсиз ҳоли учрашиш имконияти таъминланган.

Рашид Қодиров ва бошқа иштирокчиларнинг ёшини ҳисобга олган ҳолда, дастлабки тергов давомида уларнинг соғлиғи Ички ишлар вазирлиги тиббиёт муассасаларининг доимий назорати остида бўлди. Ишни судда кўриб чиқиш жараёнида ҳам доимий тиббий ёрдам кўрсатилмоқда ва барча зарур тиббий асбоб-ускуналар билан жиҳозланган алоҳида махсус транспорт воситаси ажратилган.

Тергов давомида суд-тиббий экспертиза ўтказилган, унинг хулосасига кўра, Рашид Қодировнинг соғлиғининг ҳолати қамоқда сақлашга тўсқинлик қилмаслиги маълум бўлган ва унда ҳеч қандай тан жароҳатлари аниқланмаган.

Таъкидлаш жоизки, Москва шаҳрининг "Щеглов и партнёры" адвокатлик бюроси билан тузилган ҳуқуқий ёрдам кўрсатиш шартномаси асосида фаолият юритувчи адвокат А.Мадьяров Рашид Қодировга нисбатан қўзғатилган жиноят ишида адвокат сифатида иштирок этишини таъминлашга оид чоралар кўриш тўғрисида илтимоснома билан фақатгина 2018 йил 18 июль кунм мурожаат қилган.

Тергов органлари зудлик билан бу ҳақида Рашид Қодировни хабардор қилиш чораларини кўрган, Қодиров А.Мадьяров ҳузурида ўз ташаббусига кўра унинг хизматларидан воз кечиб, унга нисбатан ҳеч қандай жисмоний ёки руҳий босим ўтказилмаётганлиги, у ихтиёрий равишда кўрсатмалар бераётгани ҳақида маълум қилган. Шунингдек, Рашид Қодиров айни пайтда унинг ҳуқуқларини бошқа адвокат ҳимоя қилаётгани ва қўшимча адвокат жалб қилинишига эҳтиёжи йўқлигини билдирган.

Бундан ташқари, учрашувда А.Мадьяровнинг талабига биноан Р. Қодиров унга ўз танасини кўрсатган, шундан сўнг А.Мадьяров тан жароҳатлари йўқлигига ишонч ҳосил қилган. Шу билан бирга, Рашид Қодиров А.Мадьяровдан ўғли А.Қодиров билан боғланишни ва етказилган зарарни қоплаш ҳақидаги илтимосини ўғлига етказишини сўраган.

Тергов давомида Рашид Қодиров ўз айбини фақат қисман тан олган, бу эса унга айблов бўйича ўз фикрини эркин ифода этиш имконияти берилгани ва унинг бундай мазмундаги кўрсатмаларини олишда унга нисбатан қандайдир босим ўтказилганлик факти мавжуд эмаслигидан далолатдир.

Бундан ташқари, 2019 йил 17 январь куни суд мажлисида раислик қилувчи судьянинг саволига Рашид Қодиров тергов давомида ўз кўрсатмаларини ихтиёрий равишда берганлигини маълум қилди ва бу суд мажлиси баённомасида қайд этилди.

Бугунги кунда Рашид Қодировга нисбатан қўзғатилган жиноят иши суд томонидан кўриб чиқилмоқда.

Бош прокуратура жиноят ишларига жалб этилган фуқароларнинг ҳуқуқ ва эркинликларини таъминлаш бўйича барча зарур чоралар кўрилишини кафолатлайди".