Ҳиндистондаги фестивалда 30 киши ҳалок бўлди

Ҳиндистонда ҳар 12 йилда бир марта ўтказиладиган ва 45 кун давом этадиган “Маҳа Кумб Мела” фестивалидаги тиқилинчда 30 киши ҳалок бўлиб, 60 киши жароҳатланди. Бу ҳақда “Hindustan Times” хабар берди.  

Нашрнинг ёзишича, ушбу фестиваль Ҳиндистон шимолидаги Уттар-Прадеш штатида ўтказилган. Ҳодиса Сангам дарёси томон гуноҳини ювиш учун кетаётганлар тўсиқдан сакраб ўтаётганда юз берган. Бу маросим ҳиндуларнинг муқаддас тақвимидаги муҳим воқеа бўлиб, бу йил жами 400 миллиондан зиёд фуқаро Тривени Сангам дарёси бўйлаб “муқаддас сув” ҳисобланган Ганг, Ямуна ва Сарасвати дарёларининг қўшилиш жойида 45 кунлик “зиёрат” қилиши кутилмоқда.

Шунингдек, Ҳиндистон Бош вазири Нарендра Моди ижтимоий тармоқ орқали марҳумларнинг яқинларига ҳамдардлик билдирган. 

Маълумот учун, ҳиндлар дунёдаги энг йирик ушбу диний байрам пайти дарёда чўмилиш гуноҳларни ювади деб ҳисоблайди. 2001 йил 60 миллион киши бир кунда Ганг сувига тушиш учун тўпланиб, жаҳон рекордини ўрнатган. Ҳатто 2021 йил ҳам миллионлаб ҳиндлар COVID-19 вируси авж олганига қарамай Тривени Сангам дарёсида чўмилган.

Моҳимбегим Маъруфалиева