Ҳиндистон Бош вазири Нарендра Моди истеъфога чиқди

Ҳиндистон Вазирлар Маҳкамаси парламент қуйи палатасини тарқатиб юборишни тавсия қилганидан сўнг, Бош вазир Нарендра Моди истеъфога чиқди. Бу ҳақда бугун, 5 июнь куни Президент котибияти матбуот хизмати хабар берди.

“Бош вазир Нарендра Моди бугун Президент билан учрашди ва Вазирлар Маҳкамаси билан бирга истеъфога чиқди. Президент истеъфони қабул қилди ҳамда Нарендра Модига ва Вазирлар Маҳкамасига янги ҳукумат ишга киришгунга қадар ишни давом эттиришни сўраб мурожаат қилди”, дейилади давлат раҳбари котибияти сайтида эълон қилинган хабарда.

Ҳиндистон парламентига сайловлардан сўнг амалдаги Бош вазир ва Вазирлар Маҳкамаси истеъфога чиқиши керак. Улар янги ҳукумат тузилмагунча ўз лавозимларида қолади.

"Indian Express"нинг ёзишича, бугун, 5 июнь куни Ҳиндистон Бош вазири ҳукуматнинг бўлажак таркибини келишиш учун коалиция бўйича ҳамкорларни мамлакат пойтахтига йиғди.

Ҳиндистонда 19 апрелдан буён ўтказилаётган умумий парламент сайловлари якунланди. Овозларни санаш 4 июнь куни якунланди. Овоз бериш етти босқичда бўлиб ўтди. 968 миллион сайловчи рўйхатга олинган. Дастлабки маълумотларга кўра, сайловчиларнинг ўртача иштироки тахминан 62 фоизни ташкил қилган.

Ҳиндистон парламенти қуйи палатасидаги ўринларнинг ярмидан кўпроғини миллатчи "Бҳаратия Жаната" партияси (543 ўриндан 279 ўрин) бошчилигидаги Миллий демократик альянс қўлга киритди. Мухолифат 234 ўринни қўлга киритди.

Моди илк бор 2014 йилда ҳукумат раҳбари этиб сайланган, 2019 йилги сайловларда унинг партияси парламентдаги кўпчиликни 282 ўриндан 303 ўринга кўтарган.