Hibsga olinganlarning gapirmaslik huquqi Konstitutsiya bilan mustahkamlanmoqda

O‘zbekistonda hibslangan shaxslarning sukut saqlash huquqidan foydalanishi Konstitutsiya bilan mustahkamlanishi kutilmoqda. Bu haqda bugun, 9 mart kuni Oliy Majlis Qonunchilik palatasi yalpi majlisida deputat Jahongir Shirinov so‘z ochdi. 

Yalpi majlisda “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasi bo‘yicha O‘zbekiston Respublikasi referendumini o‘tkazish haqida”gi qaror qabul qilinishi kutilmoqda.

Qonun loyihasiga ko‘ra, “Xabeas korpus” instituti ko‘lamini yanada kengaytirish maqsadida shaxsni 48 soatdan ortiq sudning qarorisiz ushlab turish mumkin emasligi, telefon so‘zlashuvlarini eshitishga va tintuv o‘tkazishga faqat sud ruxsat bersagina amalga oshirilishi mumkinligi belgilanmoqda. 

Shu bilan birga, ushlangan shaxsga sukut saqlash va boshqa huquqlari hamda ushlab turish asoslari sodda tilda ilk soniyalardanoq tushuntirilishi, shuningdek hech kim o‘ziga va yaqin qarindoshlariga qarshi ko‘rsatma berishga majbur emasligi kabi “Miranda” qoidalari Konstitutsiya darajasida belgilanmoqda. 

“Bu qoidalar insonni nohaq jinoiy ta’qibdan, ayrim tergov organlarining noqonuniy hatti xarakatlaridan himoya qiladi. Va e’tibor bering, ushbu qoidalar faqatgina sohaviy qonunlarda emas, balki aynan eng oliy hujjat – Konstitutsiyada belgilanmoqda”, deydi bular bo‘yicha tushuntirish bergan deputat Jahongir Shirinov.

Shuningdek, qayd etilishicha, inson huquqlarini himoya qilishda advokatlarning rolini oshirish, ularning prokurorlar bilan teng tortishuvchanlik prinsipi asosida faoliyat ko‘rsatishini ta’minlashga qaratilgan normalar kiritilmoqda. 

“E’tibor bering! Prokuraturaga oid konstitutsiyaviy normalar qanday alohida bobda aks ettirilgan bo‘lsa, xuddi shunday Konstitutsiyamizga advokaturaga bag‘ishlangan yangi bob kiritilmoqda”, deydi Shirinov.