Венгрияда депутатлар ўз ойлик маошларини икки баробар қисқартирди

Венгрия парламенти депутатлари ўз маошлари ва имтиёзларини қисқартириш ҳақидаги қонун лойиҳасини бир овоздан маъқуллади. Бу ҳақда “New Straits Times” нашри хабар берди.

Қайд этилишича, Венгрия депутатлари кеча, 8 июнь куни ўз маошлари ва имтиёзларини қисқартириш ҳақидаги қонун лойиҳасини бир овоздан қўллаб-қувватлаган. Бу қарор Бош вазир Петер Мадьяр томонидан давлат бошқаруви харажатларини камайтириш мақсадида илгари сурилган.

199 ўринли парламентнинг мажлисда иштирок этган 189 нафар депутати ҳукмрон “Tisza” партияси томонидан тақдим этилган қонун лойиҳасини қўллаб-қувватлаган. Қонунга мувофиқ, депутатларнинг ойлик асосий маоши келаси ойдан бошлаб солиқдан олдинги ҳисобда 40 фоизга қисқартирилиб, 3 690 евро эквивалентига туширилади.

Шунга қарамай, асосий маош мамлакатдаги ўртача иш ҳақидан деярли икки баробар юқори бўлиб қолади. Виктор Орбан даврида эса бу кўрсаткич ўртача иш ҳақидан тахминан уч баробар юқори бўлган. 

Қонунга кўра, Бош вазир, парламент спикери ва парламент қўмиталари аъзоларининг маошлари ҳам қисқартирилади. Мобиль телефон харажатларини қоплаш амалиёти тўлиқ бекор қилинади. Шунингдек, депутатларга офис ижараси, тураржой ва ходимлар учун бериладиган қўшимча тўловлар ҳам камайтирилади.

Петер Мадьярнинг айтишича, ушбу чоралар парламентнинг амалдаги тўрт йиллик ваколат муддати давомида бир йиллик фаолият харажатларига тенг маблағни тежаш имконини беради. Унинг айтишича, бу маблағлар коррупция оқибатида бўшаб қолган давлат хазинасини тўлдиришга ёрдам беради.

“Бу нафақат инсонийлик, балки ўзини тийиш ва камтарлик масаласи ҳамдир”, деган Петер Мадьяр ўтган ой RTL хусусий телеканалига берган интервьюсида.

Ўша интервьюда Мадьяр шаҳар ҳокимлари маошларини ҳам қисқартириш кераклигини айтган, бу эса айрим маҳаллий раҳбарларнинг норозилигига сабаб бўлган. 

Маълумот учун, танқидчилар мамлакатнинг собиқ бош вазири Виктор Орбанни мухолифат депутатларини рози қилиш учун юқори маошлар белгилаганликда айблаганди. 12 апрель куни бўлиб ўтган сайловларда катта устунлик билан ғалаба қозонган ва асосан сиёсатга янги кириб келганлардан ташкил топган “Tisza” партияси раҳбари Петер Мадьяр мазкур амалиётнинг энг кескин танқидчиларидан бири бўлган.

Консерватив ва Европа Иттифоқини қўллаб-қувватловчи Петер Мадьяр ҳокимиятга кенг қамровли ислоҳотлар, жумладан, коррупцияга қарши курашни кучайтириш ваъдалари билан келган. Мамлакатнинг коррупцияга қарши курашувчи “Integrity Authority” ташкилоти раҳбари Ференц Биронинг баҳолашича, Виктор Орбаннинг 16 йиллик ҳокимияти даврида тизимли коррупция Венгрияга камида 186 миллиард евро зарар етказган.

Эслатиб ўтамиз, аввалроқ Венгриянинг янги сайланган Бош вазири Петер Мадьяр парламентда мамлакат Президентига нисбатан импичмент (лавозимидан четлатиш) жараёнини бошлаш ниятида эканини маълум қилганди.