Британияда 18 ёшли талаба ўлдирилиши ортидан халқ оёққа турди (видео)

Британиянинг Саутгемптон шаҳрида полициянинг бепарволиги туфайли ҳалок бўлган 18 ёшли талаба Генри Новакнинг ўлдирилишига қарши норозилик намойишлари бўлиб ўтди. Намойиш ҳуқуқ-тартибот идоралари ходимлари билан зўравонлик тўқнашувларига айланиб кетди. Бу ҳақда “Sky News” телеканали хабар берди.

Қайд этилишича, жорий йилнинг 2 июнь куни кечқурун Саутгемптонда Генри Новакнинг ўлдирилиши ва полициячиларнинг унга нисбатан қилган муносабатига норозилик билдириш учун одамлар тўпланган. Кейинчалик акция тўқнашувларга айланиб кетган – намойишчилар ҳуқуқ-тартиботчиларга қарата шишалар ва бошқа буюмларни улоқтирган.

Жиноятчилик ва полиция масалалари бўйича вазир Сара Жонс ушбу норозилик намойишларидан кейин икки киши ҳибсга олинганини маълум қилди: улардан бири полициячига ҳужум қилгани, иккинчиси эса қурол сақлагани учун ушланган.

Мулозим аёл ижтимоий тармоқлар ва дронлардан олинган видеоёзувлар ўрганиб чиқилгач, янги ҳибсга олишлар бўлишини билдирган. У, шунингдек, намойишчиларни вазминликка чақирган.

“Менинг фикримча, биз буни ҳурмат қилишимиз, ғазаб ва тушкунликни жиловлашга ҳаракат қилишимиз, адолат ўз йўлидан боришига қўйиб беришимиз ҳамда бундан марҳумнинг оиласи биздан сўрагандек фойдаланишимиз керак. Яъни, совуқ қурол қўлланилган жиноятлар эпидемиясига қарши курашиш учун кўпроқ ҳаракат қилишимиз ва унинг ўлими яхшиликка томон ўзгаришларга олиб келишини таъминлашимиз лозим”, дейди Жонс.

Қотиллик тафсилотлари ва суд ҳукми

18 ёшли Генри Новак ўтган йилнинг 4 декабрида Саутгемптонда вафот этган эди. Талаба 23 ёшли Викрум Дигва томонидан яраланган. Ҳужум қилган шахс 21 сантиметрли тиғ билан зарба берган ва унинг сўзларига кўра, у бу қуролни ўзининг сикхизм эътиқодининг бир қисми сифатида ёнида олиб юрган.

Дигва ярадор Новакнинг ерда ётганини видеога олган. Полиция етиб келганда эса ҳужум қилган шахс офицерларга ёлғон гапириб, Новак унинг бошидаги тюрбанини уриб туширганини ва уни ирқий камситганини даъво қилган.

Унинг бу баёнотлари полицияни Новак ерда жон бераётган бир пайтда аввал унинг қўлларига кишан тақишга ундаган. Ярадор йигит бир неча бор нафас ололмаётганидан шикоят қилган. У пичоқланганини хабар қилишга уринган, бироқ полициячилардан бири унга: “Бундай деб ўйламайман, оғайни”, деб жавоб берган. Якунда офицерлар ундан кишанларни ечиб, юрак-ўпка реанимациясини бошлаган, аммо ўсмир йигит тез орада вафот этган.

Дигва энг кам 21 йил қамоқ муддатини ўташ шарти билан умрбод озодликдан маҳрум этилган. Бу шуни англатадики, маҳкумда шартли равишда муддатидан олдин озодликка чиқиш учун назарий имконият энг камида 21 йилдан кейингина пайдо бўлади.