FIFA’га нисбатан фирибгарлик бўйича тергов бошланди

Нью-Йорк ва Нью-Жерси штатлари бош прокурорлари Летиша Жеймс ҳамда Женнифер Девенпорт FIFA’га нисбатан динамик нарх белгилаш ва эҳтимолий фирибгарлик ҳолатлари бўйича тергов бошланганини эълон қилди. Бу ҳақда уларнинг қўшма баёнотида маълум қилинди. 

“Нью-Йорк аҳолиси Жаҳон чемпионатининг ўз шаҳрига келишини йиллар давомида кутди ва улар чипталарни адолатли нархларда сотиб олиш имкониятига эга бўлиши керак. Ҳеч ким ўринлар учун асоссиз равишда юқори нарх тўлашга мажбур бўлмаслиги лозим. Мухлислар харид қилган чипталари ўз қийматига мос эканига ишониши керак. Аммо FIFA Жаҳон чемпионати чипталарини сотиб олиш жараёнини тушунарсизлик, сунъий танқислик ва ҳаддан ташқари юқори нархлар тизимига айлантирди. Бу эса истеъмолчилар ва меҳнаткаш Нью-Жерси аҳолиси ҳисобидан амалга оширилмоқда”, дейилади баёнотда.

Прокурорлар мухлислардан келиб тушган қатор шикоятларни ўрганмоқда. Улар орасида ўринларни қайта тақсимлаш, чипта нархларининг кескин ошиб кетиши ҳамда биринчи тоифадаги чипталар учун янги ва қимматроқ кичик тоифа жорий этилгани ҳақидаги эътирозлар бор.

Шунингдек, Калифорния бош прокурори Роб Бонта ҳам мухлисларнинг чалғитувчи чипта савдоси ҳақидаги шикоятларидан сўнг тергов бошлаган ва FIFA’дан расмий тушунтириш талаб қилган.

Эслатиб ўтамиз, ҳозирда Ўзбекистон миллий терма жамоаси Жаҳон чемпионатида иштирок этиш учун АҚШда бўлиб турибди.