Британияда Фаластин учун намойишлар ўтказиш чекланиши мумкин

Буюк Британияда айрим Фаластин тарафдорларининг намойишлари тақиқланиши ва “globalise the Intifada” иборасини ишлатганлар жавобгарликка тортилиши мумкин. Бу ҳақда мамлакат Бош вазири Кир Стармер BBC телеканалига берган интервьюсида айтиб ўтган.

Стармер Фаластин тарафдорлари намойишларида қўлланиладиган шиорларга нисбатан қатъийроқ чекловлар жорий этишни қўллаб-қувватлашини билдирган. 

“Мен сўз эркинлиги ва тинч намойишларнинг катта ҳимоячисиман, лекин “globalise the Intifada” каби шиорларни мутлақо қабул қилиб бўлмайди. Бу борада, албатта, янада қатъий чоралар кўрилиши керак”, деган у. 

Стармернинг айтишича, қўшимча чоралар ҳақида полиция билан маълум вақтдан бери муҳокамалар олиб борилмоқда. Айрим митингларни тўлиқ тақиқлаш масаласига тўхталиб, у баъзи ҳолларда бу тўғри қарор бўлишини айтган. Стармер ушбу иборани ҳафта бошида ўта кескин ирқчилик деб атаган ва уни ишлатганлар жиноий жавобгарликка тортилиши кераклигини билдирган. Лондон Метрополитен полицияси комиссари сэр Марк Роули ҳам BBC’га берган интервьюсида бу иборани ишлатганлар эҳтимол қўлга олиниши мумкинлигини айтган. Бу шиорни қўллаб-қувватловчилар уни Фаластин тарафдорлари ҳаракатини глобал миқёсга кенгайтиришга чақириқ сифатида тушунтиришади.

Охирги пайтларда Британия ҳукумати Исроилнинг Ғазодаги уруши фонида Фаластин тарафдорлари фаолиятига босим ўтказаётгани учун бир неча бор танқид қилиняпти. Ўтган ой Лондонда “Palestine Action” ҳаракатига қўйилган тақиққа қарши оммавий йиғилишда 500 дан ортиқ киши қўлга олинганди.

Эслатиб ўтамиз, аввалроқ Европанинг Ирландия, Испания ва Словения миллий телерадиокомпанияларида намойишлар сабаб бу йил дунёга машхур “Eurovision” қўшиқлар танловини эфирга узатмаслиги ҳақида эълон қилинган эди.

Ойбек Рустамов