Эпштейн қурбонларини Лондондаги квартираларда яширган – ОАВ

АҚШда жинсий жиноятларда айбланган Жеффри Эпштейн Британия полицияси унинг фаолиятини текширишдан бош тортганидан кейин бир неча йил давомида Лондон марказида бир нечта квартираларни ижарага олган ва у ерда жинсий зўравонликка учраган аёлларни жойлаштирган. Бу ҳақда BBC суриштирувида сўз боради.

Журналистлар Кенсингтон ва Челси каби нуфузли туманларда ижарага олинган тўртта квартирага оид далилларни аниқлаган. У ерда яшаган аёлларнинг аксарияти Россия ва Шарқий Европадан бўлиб, уларнинг олти нафари кейинчалик Эпштейннинг қурбони бўлганини маълум қилган. Баъзи аёллар молиячи билан ҳамкорлик қилишга мажбурланган – улар жинсий эксплуатация тармоғи учун янги қурбонларни ёллаш билан шуғулланган.

Квартиралар ижараси, шунингдек, аёлларнинг “Eurostar” поездларида Парижга мунтазам сафарлари Эпштейн 2019 йил июль ойида АҚШда ҳибсга олингунига қадар давом этган. Таҳририят ихтиёрига келиб тушган ҳужжатларга кўра, 2011 йилдан 2019 йилгача Эпштейн камида 53 та “Eurostar” чиптасини сотиб олган. Уларнинг 33 таси 2015 йилда қурбонлардан бири Виржиния Жуффре полицияга жинсий эксплуатация мақсадида одам савдоси қурбони бўлгани ҳақида ариза берганидан кейин сотиб олинган.

Нашрнинг ёзишича, Скотленд-Ярдда Эпштейнга нисбатан терговни 2015 йилдаёқ бошлаш имконияти бўлган, бироқ Жуффре сўроқ қилинганидан сўнг, “бошқа халқаро идоралар” бу иш билан яхшироқ шуғулланади деган важ билан рад этилган. 2020 йилда иккинчи аёл полицияга мурожаат қилган, аммо унинг аризаси ҳам эътиборсиз қолдирилган. Британия расмийлари Эпштейннинг Лондондаги квартираларидан камида биттаси ҳақида билган.

Ҳуқуқ ҳимоячилари ва собиқ полиция ходимлари ҳукуматнинг ҳаракатсизлигини танқид қилган. Қулдорликка қарши кураш бўйича собиқ комиссар Кевин Хайленд полиция тергов учун имкониятларни бой берганини айтган. Инсон ҳуқуқлари бўйича адвокат Тесса Грегори тергов ўтказилмаганини “ҳайратланарли” деб атаб, давлат одам савдоси фактлари бўйича суриштирув олиб боришга мажбур эканини таъкидлаган. Скотленд-Ярд эса қонун доирасида иш тутилганини маълум қилган.

“The Telegraph” газетасининг хабар беришича, АҚШ Адлия вазирлиги Британия полицияси томонидан Буюк Британиянинг АҚШдаги собиқ элчиси лорд Питер Мандельсон ва унинг Эпштейн билан алоқалари бўйича олиб борилаётган терговга тўсқинлик қилмоқда.

Нашр маълумотларига кўра, Америка расмийлари Эпштейн иши материалларидаги муҳим далилларни Британия томонига ихтиёрий равишда беришдан бош тортмоқда. АҚШ Адлия вазирлиги Скотленд-Ярддан ўзаро ҳуқуқий ёрдам кўрсатиш тўғрисида расмий сўров юборишни талаб қилмоқда. Бундай процедура камида бир ярим йил вақт олиши мумкин, бу эса Мандельсонга нисбатан терговни сезиларли даражада секинлаштиради.

2026 йил февраль ойида Париж прокуратураси Эпштейннинг Франциядаги фаолияти бўйича одам савдоси ва пул ювиш гумонлари билан иккита тергов бошлаган. Қурбонларнинг адвокатлари Буюк Британияда ҳам оммавий тергов ўтказишга чақирмоқда.

Эслатиб ўтамиз, аввалроқ БМТнинг мустақил экспертлари Эпштейн файлларида одам савдосида айбланаётган шахсларни жавобгарликка тортишга чақирган эди.