13 та туман ҳокими интизомий жазога тортилади

Ўзбекистонда саноат режасига чиқа олмаган 13 та туман ҳокими интизомий жазога тортилади. Бу ҳақда бугун, 24 апрель куни Президент Шавкат Мирзиёев раислигида ўтаётган биринчи чорак кўрсаткичларини тармоқ ва ҳудудлар кесимида танқидий таҳлил қилиш ва йилнинг қолган даврида қилинадиган ишлар муҳокамасига бағишланган видеоселектор йиғилишида маълум қилинди.

Йиғилишда саноат ва экспорт масалалари ҳам кўриб чиқилган. Хусусан, Қамаши, Қарши, Миришкор, Арнасой, Шароф Рашидов, Янгиобод, Навбаҳор, Косонсой, Қумқўрғон, Фурқат, Шовот, Шайхонтоҳур, Сергели туманлари саноат режасига чиқа олмагани танқид қилинган. Ушбу 13 та туман ҳокимига режага қанча етмаганига қараб, интизомий жазо чорасини кўриш топширилган.

Ички бозорда мис таклифи кўпайтирилган бўлса-да, қайта ишлаш ойига 6 минг тоннадан ошмаётгани кўрсатиб ўтилган. Оқибатда биринчи чоракда электротехника соҳасида саноат ўсиши прогноздаги 11,2 фоиз ўрнига 7,8 фоизга, экспорт режаси бор-йўғи 57 фоизга бажарилган.

Электротехника экспорти учун 100 миллион доллар ресурс бериб, айланма маблаққа гаровсиз кредит ажратиш имконияти яратилди. Лекин бирорта банк ушбу шартларда кредит ажратмаганига эътироз билдирилган.

Мутасаддиларга ишлаб чиқариши, экспорти камайган ҳар бир корхонага бориб, экспортини молиялаштириш, инвестиция лойиҳаси бўйича қандай масаласи бўлса, жойида ҳал қилиш топширилган.

Умуман, иккинчи чорак якуни билан соҳада ишлаб чиқаришни 25 триллион сўмга, экспортни 1 миллиард долларга етказиш вазифаси қўйилган.