Данияда иккита поезд тўқнашди. 17 киши жароҳатланди (видео)

Бугун, 23 апрель куни Даниянинг Хиллерёд шаҳри яқинидаги Грибсков темир йўлида иккита поезд тўқнашиб кетди, жабрланганлар бор. Бу ҳақда воқеа жойида бўлган полиция навбатчи офицерларига таяниб, “Danmark Radio” хабар берди.

Расмийларнинг маълум қилишича, 17 киши жароҳатланган, улардан тўрт нафарининг аҳволи ўта оғир деб баҳоланмоқда. Воқеа жойига мудофаа хизматининг вертолёти етиб борган. Нашрнинг қайд этишича, ушбу ҳудудда поездлар ҳаракати номаълум муддатга тўхтатилади. Қутқарув амалиёти муносабати билан полиция яқин атрофдаги йўлларни ёпиб қўйган.

Дания муҳандислар ассоциациясининг (IDA) темир йўл транспорти бўйича эксперти Кристиан Мадсен TV 2 Kosmopol телеканалига берган интервьюсида тўқнашув поезд машинистларидан бирининг айби билан юз берганини айтган. Мадсеннинг фикрича, у станциялардан биридан чиқишда тўхташ ишорасига (қизил чироққа) амал қилмаган. 

“Даниядаги кўплаб темир йўл тармоқларида “қизил” чироқда ўтиб кетган поездларни автоматик равишда тўхтатадиган хавфсизлик тизими мавжуд, бироқ авария содир бўлган участкада бундай тизим ўрнатилмаган эди”, деб қайд этган эксперт.

Эслатиб ўтамиз, апрель ойи бошида Франциянинг Па-де-Кале департаментида TGV тезюрар поезди ҳарбий техника ташиётган юк машинаси билан тўқнашиб кетган эди. Ўшанда машинист ҳалок бўлган ва 27 киши жароҳатланган эди.