Катта тозалаш: АҚШ Ҳарбий-денгиз кучлари вазири ҳам ишдан ҳайдалди

АҚШ Ҳарбий-денгиз кучлари вазири Жон Фелан ўз лавозимини тарк этди. Унинг истеъфоси дарҳол кучга кирган. Бу ҳақда Пентагон матбуот котиби Шон Парнелл Х саҳифасида маълум қилди.

Унинг сўзларига кўра, Мудофаа вазири ва унинг ўринбосари номидан Феланнинг АҚШ Мудофаа вазирлиги ҳамда Ҳарбий-денгиз кучларидаги хизматлари учун миннатдорлик билдирилган ва унга келгуси фаолиятида муваффақият тиланган.

Вазир вазифасини вақтинча Хунг Као бажаради. У бунгача Феланнинг ўринбосари лавозимида ишлаган.

CNN маълумотига кўра, Жон Фелан илгари тадбиркор бўлган ва ҳарбий хизмат тажрибасига эга эмас эди. У 2025 йилда, Дональд Трамп АҚШ Президенти этиб сайлангач, ушбу лавозимга тайинланган. Телеканалнинг таъкидлашича, Фелан рафиқаси билан бирга Трампнинг сайловолди кампанияси учун маблағ йиғиш билан ҳам шуғулланган.

АҚШ Президенти Фелан ҳақида илиқ фикрлар айтиб келган.

“Жон денгизчиларимиз учун кучли таянч ва менинг тамойилимни илгари суришда қатъий етакчи бўлади. У АҚШ Ҳарбий-денгиз кучлари манфаатларини биринчи ўринга қўяди”, деган эди Трамп.

Апрель ойининг бошида АҚШда Қуруқликдаги қўшинлар штаби бошлиғи, генерал Ренди Жорж ҳам истеъфога чиқарилгани эълон қилинган эди. СБС телеканали манбаларига таяниб хабар беришича, унинг лавозимдан кетишини Пентагон раҳбари Пит Ҳегсет талаб қилган. Маълумотларга кўра, у бу лавозимда ўзи ва Трамп шакллантирган армия концепциясини амалга ошира оладиган шахсни кўришни истайди.

13 апрель куни АҚШ ҳарбийлари Трамп топшириғи билан Ҳормуз бўғозида блокада бошлаган. У Эрон портларига кираётган ва чиқаётган кемаларга нисбатан қўлланилмоқда.

Эслатиб ўтамиз, аввалроқ АҚШ Меҳнат вазири Лори Чавес-Деремер номақбул хатти-ҳаракатлар ҳақидаги айбловлар фонида Президент Дональд Трамп маъмуриятини тарк этганди.