Эрон бузилган ҳарбий объектларни бир неча соатда тиклашни ўрганди

Эрон Америка ва Исроил зарбаларидан сўнг ерости бункерлари ва ракета шахталарини бир неча соат ичида тикламоқда. Бу ҳақда АҚШ разведкаси ҳисоботларига таяниб, “The New York Times” (NYT) хабар берди.

Ҳужжатдан келиб чиқадики, Теҳрон катта миқдордаги ракеталар ва мобил учириш қурилмаларини сақлаб қолган. Бу эса ҳарбий кампаниянинг асосий мақсадларидан бири – Эроннинг ракета салоҳиятини йўқ қилиш амалга ошганини шубҳа остига қўяди.

Пентагон яқинда Эрон ҳужумлари шиддати пасайганини айтиб, буни Теҳрон арсеналининг камайгани билан боғлаган. Бироқ разведка маълумотларига кўра, Эрон уруш чўзилган тақдирда ёки у тугаганидан кейин босим ўтказиш қобилиятини сақлаб қолиш учун кўплаб учириш қурилмаларини бункерлар ва ғорларда яшириб келмоқда.

АҚШ разведкаси ҳисоботлари билан таниш бўлган расмийларга кўра, Теҳрон қолган баллистик ракеталар ва учириш қурилмаларидан Исроил ва минтақадаги бошқа мамлакатларга зарба бериш учун фойдаланиш имкониятини сақлаб турибди. Бундан ташқари, Эрон “ёлғон нишонлар”дан  фаол фойдаланмоқда, шу сабабли АҚШ вайрон қилинган қурилмаларнинг қанчаси ҳақиқий эканлигини аниқ айта олмаяпти.

NYT қайд этишича, ҳужумлар шиддати пасайганига қарамай, Эрон Исроил ва АҚШ билан боғлиқ объектларга кунига 15 тадан 30 тагача баллистик ракета ва 50 тадан 100 тагача камикадзе дронларини учиришда давом этмоқда.

Эслатиб ўтамиз, аввалроқ Эрон мамлакат ҳаво ҳужумидан мудофаа тизимлари A-10 Thunderbolt II ва F-15E қирувчи самолёти уриб туширилганини эълон қилган эди. АҚШ томони ҳам битта жанговар самолёт йўқотилганини тасдиқлаган. Экипаждан бир нафари қутқарилган, иккинчи учувчининг тақдири ҳозирча номаълум.