АҚШ Гренландия бўйича “ҳайратланарли” келишув устида ишламоқда

АҚШ маъмурияти НАТО ва Гренландия билан ҳамкорликда Қўшма Штатлар учун “ҳайратланарли” бўлган келишув устида ишламоқда. Бу ҳақда Оқ уйдаги манбасига таяниб, “The New York Times”газетаси хабар берди.

Газета ушбу Оқ уй шарҳини Дания телерадиокомпанияси Гренландиядаги “махфий таъсир ўтказиш операциялари” билан боғлаган уч нафар америкалик ҳақидаги материалда келтирмоқда. NYT маълумотларига кўра, гап тадбиркор Дрю Хорн, Арктикани тадқиқ қилиш бўйича федерал комиссиянинг собиқ аъзоси Томас Дэнс ва Дональд Трампнинг маслаҳатчиси Крис Кокс ҳақида бормоқда. Нашрнинг ёзишича, уларнинг учаласи ҳам АҚШ манфаатларини очиқ-ойдин илгари сурганликларини билдиришган.

Улардан камида икки нафари оролга ташрифи давомида Дания разведкаси кузатуви остида бўлган. Шунингдек, газета АҚШ маъмурияти 31 январь куни Гренландиянинг келгуси мақоми бўйича музокаралар бошланганини эълон қилганини ва ҳам АҚШ, ҳам Европа учун манфаатли келишувдан умидвор эканини билдирганини эслатиб ўтган.

Гренландия Дания Қироллигининг таркибий қисми ҳисобланади, бироқ 2009 йилда ўзини ўзи бошқариш ҳуқуқи билан мухторият мақомини олган. Шунга қарамай, АҚШ Президенти Дональд Трамп орол Қўшма Штатларнинг бир қисми бўлиши кераклигини бир неча бор таъкидлаган.

5 январь куни Трамп ўз мамлакати миллий хавфсизлигини таъминлаш мақсадида Гренландия ҳудуди устидан назорат ўрнатиш режаларини эълон қилди. Дания Мудофаа вазирлиги эса оролга бостириб кирилган тақдирда муносиб жавоб қайтаришга ваъда берди.

Ўтган йилнинг март ойида Россия президенти Владимир Путин Трампнинг Гренландияни АҚШга қўшиб олиш режаси жиддий эканини айтган эди.

Бундан аввал АҚШ Конгресси юзага келиши мумкин бўлган зиддиятнинг олдини олиш учун Гренландия бўйича ҳар қандай келишувни назорат қилишга чақирган эди.