Афғонистонда сув тошқини: уйлар оқиб кетди, 22 киши ҳалок бўлди

Афғонистонда охирги икки кун ичида кучли ёмғирлар оқибатида юзага келган сув тошқинлари биноларнинг қулашига ва 22 киши ҳалок бўлишига олиб келди. Бу ҳақда мамлакатнинг фавқулодда вазиятлар миллий бошқармаси хабар қилди.

Қайд этилишича, сув тошқинлари 13 вилоят бўйлаб содир бўлган. Об-ҳаво билан боғлиқ ҳодисалар оқибатида жами 22 киши ҳалок бўлган, 32 киши жароҳатланган ва 241 та уй зарар кўрган. Мамлакат аҳолиси об-ҳавонинг ёмонлашуви туфайли хавф сақланиб қолаётганидан огоҳлантирилган.

Қурбонларнинг аксарияти мамлакатнинг марказий ва шарқий вилоятлари – Парвон, Майдон Вардак, Дайкунди ва Логар ҳудудларида қайд этилган. Ушбу ҳудудларда кучли ёғингарчилик тўсатдан сув тошқинларини юзага келтирган, қишлоқ ва тоғли ҳудудларда уйларнинг қулашига олиб келган.

Расмийларга кўра, айрим ҳудудларда вазият беқарорлигича қолмоқда ва яна ёмғир ёғиши ҳамда янги сув тошқинлари юзага келиш хавфи мавжуд.

Маълумот учун, Афғонистон табиий офатларга тез-тез дуч келадиган давлатлардан бири бўлиб, Бирлашган Миллатлар Ташкилоти уни иқлим ўзгаришига энг заиф мамлакатлар қаторига киритган.

2021 йилда “Толибон” ҳокимиятни қўлга олганидан сўнг мамлакат иқтисодиётининг асосий таянчи бўлган халқаро ёрдам кескин камайган, бу эса давлатнинг бундай офатлар билан курашиш имкониятларини чеклаб қўйган.

БМТ Тараққиёт дастурининг 2025 йил ноябрь ойидаги ҳисоботида қайд этилишича, ўтган йилда содир бўлган зилзилалар, сув тошқинлари ва қурғоқчилик Афғонистонда 8 мингта уйни вайрон қилган.

Эслатиб ўтамиз, аввалроқ Покистоннинг Афғонистон шарқидаги Кунар вилоятига берган ракета зарбалари оқибатида бир киши ҳалок бўлган ва 16 киши жароҳат олганди.