Учинчи жаҳон уруши аллақачон бошланган бўлиши мумкин – Вучич

Сербия Президенти Александр Вучич Учинчи жаҳон уруши, эҳтимол, аллақачон бошланганини ва глобал можаронинг олдини олиш ниҳоятда қийин бўлишини айтди. Бу ҳақда у “Berliner Zeitung” нашрига берган интервьюсида сўз очди.

“Нефть, газ, фойдали қазилмалар, нодир металлар ва бошқа хомашёлар учун кураш анчадан бери давом этмоқда. Агар Биринчи ва Иккинчи жаҳон урушларига назар ташласангиз, иккаласи ҳам минтақавий можаролардан бошланганини кўрасиз. Фақат кейинроқ йирикроқ ҳарбий ва сиёсий иттифоқлар шаклланиб, якунда тўғридан тўғри тўқнаш келган. Бугун биз шунга ўхшаш нарсани кузатмоқдамиз”, дейди у.

Вучичнинг сўзларига кўра, эскалациядан (вазият кескинлашувидан), эҳтимол, ҳали қочиш мумкин, бироқ у бунга олиб борувчи оддий йўлни кўрмаяпти, чунки “йирик давлатларнинг манфаатлари шунчалик хилма-хил ва аҳамиятлики, ҳеч ким шунчаки чекинишни хоҳламайди”. Шунингдек, у Украина ва Яқин Шарқдаги урушлар деярли муқаррар равишда янги можароларга олиб келиши ҳақида фикр билдирган. Сербия Президентининг баҳолашича, Эроннинг Қўшма Штатларга кўрсатаётган қаршилиги, катта йўқотишларга қарамай, “бошқа давлатларга сигнал юбормоқда” ва уларга “қоғозда анча кучлироқ кўринган” давлатларга ҳам қаршилик кўрсатиш мумкинлигини исботламоқда.

Украина можаросига тўхталар экан, Вучич унинг якуни ҳам “ҳали кўринмаётганини” айтган. Унинг фикрича, Россия, эҳтимол, бу урушда ғалаба қозонолмайди, лекин мағлуб бўлиши ҳам даргумон, чунки “ядро қуролига эга давлатни ҳарбий йўл билан енгиб бўлмайди”.

Сербия Президентининг ушбу баёнотлари унинг мамлакат учун ортиб бораётган хавфлар ҳақидаги сўнгги огоҳлантиришлари фонида янгради.

Эслатиб ўтамиз, жорий йилнинг 14 март куни Вучич Хорватия, Албания ва Косово Республикаси Сербияга ҳужум тайёрлаётганини айтган эди. У ўз даъволарини 2025 йил март ойида Тиранада имзоланган мудофаа соҳасидаги ҳамкорлик тўғрисидаги уч томонлама декларацияга таяниб асослаган. Сербия Президентининг баҳолашича, Хорватия, Албания ва Косово Россия ҳамда Европа ўртасидаги можаронинг кучайишини ва Яқин Шарқда каттароқ уруш бошланишини кутиб, зарба бериш учун қулай фурсат изламоқда.

7 март куни миллий ривожланиш стратегиясини тақдим этар экан, Вучич дунёда янги ва жиддийроқ ҳарбий можаролар муқаррарлигидан огоҳлантирган. 2025 йил октябрь ойида у “ҳамма урушга тайёргарлик кўраётганини ва масала фақат ким қайси томонда эканида” деб таъкидлаган. Шу билан бирга, у Сербия НАТО билан яхши муносабатларни сақлаб турганини, бироқ ҳарбий бетарафлик сиёсатига содиқ қолишини билдирган.