Ўзбекистонда 22 та наркожиноий гуруҳ фош этилди

Ўзбекистонда 2026 йилнинг январь-февраль ойларида наркотикларни ўтказиш ва тарқатиш билан шуғулланувчи 22 та уюшган наркожиноий гуруҳ фаолиятига чек қўйилди. Бу ҳақда Ички ишлар вазирлиги хабар берди.  

Қайд этилишича, 5 нафар гуруҳ етакчилари ва 84 нафар воситачи аъзолар қўлга олинган. Шунингдек, 8 та яширин нарколаборатория фош этилган. Бу жиноятчиларнинг 20 нафари психотроп дориларни, 28 нафари анъанавий наркотикларни тарқатиш билан шуғулланган.

Улардан 41 нафари синтетик наркотикларни тарқатишни интернет наркодўконлар орқали амалга оширган. Ўтган 2025 йил давомида 14 та яширин нарколабораториялар аниқланган бўлса, жорий йилнинг 2 ойи давомида 8 та нарколаборатория аниқланган.

Нарколабораторияларнинг 3 таси психотроп, моддаларни тайёрлаш билан шуғулланган яширин цехлар бўлган. Қолган 5 таси эса синтетик наркотик моддаларни тайёрловчи нарколабораторияларни ташкил қилган. 

Тезкор тадбир натижасида январь-февраль ойларида 41 кг анъанавий наркотиклар, 100 кгдан ортиқ синтетик наркотиклар, 1 миллион дозага тенг 200 мингга яқин психотроп дори воситалари ва 2 тоннага яқин прекурсорлар ноқонуний муомаладан олиб қўйилган.

Аниқланишича, ушбу уюшган наркожиноий гуруҳлар ўртача 3 ойдан 10 йилгача вақт оралиғида жиноий фаолият билан шуғулланиб келган. Бир йилда ўртача 1 миллион донадан ортиқ психотроп дори воситаларини 1 йил давомида 2-2,5 тонна “гашиш” ва “опий” каби наркотик моддаларни ўтказишни амалга оширган.

Интернет наркодўкон томонидан 1 йилда ўртача 350 кг ва 3 йил давомида 4 миллион дозага тенг бўлган 700-800 кг синтетик наркотик моддаларни “закладка” усулида тарқатган. 

Жиноий гуруҳлар турли хилдаги гиёҳвандлик воситаларини Тошкент, Наманган, Андижон, Самарқанд, Сирдарё вилоятларининг жами 40 та туман шаҳарларида фаол тарзда тарқатган.

Бундан ташқари, Афғонистондан Сурхондарё орқали, Қирғизистондан Наманган ва Андижон вилоятлари орқали, Қозоғистондан Тошкент вилояти орқали республика ҳудудига контрабанда йўли билан олиб кирилган.

Ҳозирда уюшган наркожиноий гуруҳлар фаолиятини тўлиқ аниқлаш, фош этиш ва чек қўйишга қаратилган комплекс тезкор қидирув тадбирлари давом эттирилмоқда.